Shillong, Nohprah 01: Ka ophis jong ka tnad ri mrad jong ka sorkar jylla, mynta ka sngi kala pynlong ia ka jingialang paidbah ha Sohiong, lyngba jong ka “National Livestock Mission 2017-18” halor ka phang ban kyntiew ia ka ioh ka kot lyngba kikam ri jingri.
Haba kren ha kane ka sngi kum u kongsan u Bah Samla Malngniang u ba dei u myntri jong ka sorkar jylla, ha ka juh ka por MLA jong kane ka jaka u la ong ba ka kam ri jingri sha ki nongkyndong ka long kaba iarap ha ka ioh ka kot bad ka long ruh ka lad ia kam ia ki paidbah.
U la ong ba kaei kaba ki paidbah ki juh leh baroh shi katta ha kaba ia dei bad ka kam Ri jingri ka long kaba pynmih duna, ha kane ka sngi u la kyntu ia ki paidbah ba kin shim ia ka kabu ban pyndon kam ia ka rukom ri jingri kaba katkum kane ka juk kaba mynta ban kham pynmih shibun bad ki marad kiba kham bha.
Ha ka juh ka por u la ong ba lada ki paidbah ki shim ia kane ka kam ri jingri kum ka kam kaba la wanrah da ka tnad ri mrad u la ong ba ka dei ban don ka iew ban pyniaid ia ki namar kumba ka long mynta ka jylla ka shallan beit tang ia ki mrad kiba dang im. La kyntu ia ki nongrep ba kin ri jingri kham bun ba kiew ka ioh ka kot.
Ha ka jingkren ka Dr A. Laloo kaba dei ka District A.H. & Veterinary Officer kala ong ba ia kane ka ‘Livestock Mission’ la pynwan dur ha kata ka rukom ba kane ka kam kan iaid beteng ha kaba ri jingri. Ha kane ka sngi la sam ruh ia ki sertiphket sha ki nongrep kiba la pynkiew ha ka kam ri jingri.
Ha kane ka sngi la pynlong ia ka jingbatai ia ka rukom ri jingri da ki briew jong ka tnad ri jingri bad ha ka juh ka por ki nongrep kila buh ruh shibun ki jingkylli ha kaba ia dei bad kane ka kam. Ia kane ka juh ka jingialang ban pynshlur ia ki kam ri jingri la pynlong ha Pynursla Block bad kumjuh ha Mylliem Block.
