Shillong, Risaw 07: ka Kong Joycy Lyngdoh, 35 snem ka rta, na Meghalaya, kala lah ioh ia ka nam kum ka draibar trok kynthei ba nyngkong eh ba ia treilang bad ka company Amazon bad kala pynkheiñ ia ka jingngeit ba ki kynthei kim lah ban trei ia ka kam shynrang.
Hadien ba ka kong Joycy kala trei ia kane ka kam kala lah ban ai mynsiem ia kiba bun pat kiwei ki draibar kynthei. Hadien 6 snem ba ka Kong Joycy la ñiah kala kwah ban pynkylla noh ia ka jingthrang ñiah kali jong ka sha ka lad kamai ja kpoh bad ka khlem mutdur shuh ban pyrshang ban trei da kiwei kiwei pat.
Ka kong Joycy ka bsa longïng hi marwei kata ia ki 3 ngut ki shipara kynthei bad ia la ka kmie ba kha. Hadien ba kala dep pule ka kong Joycy kala trei ha kiba bun ki kompeni ha Guwahati kynthup ia ka kompeni shna steel bad kala trei ruh kum ka manager ha kawei ka dukan.
Hadien kata kala pyrshang ban ñiah kali da kaba phah hikai ha ki paralok jong ka, bad ynda la nang bha kala sdang nyngkong eh da kaba niah school bus. Kala pynneh ia ka kam niah kali ha kiba bun ki kompeni hapoh ka nongbah.
Kata ka jingthrang jong ka kala ai kabu ban pyniasoh bad ka kynhun niah trok jong ka Amazon ha kaba kala trei kumba shi snem mynta. Ka Joycy kala ban sted sngewthuh ia ka rukom long rukom man ka jingtreikam ka kompeni bad kala lah ban pynpoi tiar kham kloi ha ki ïng briew ha sor Guwahati.
“Ka Amazon India ka la kyntiew bha ia ka imlang sahlang jong nga. Nga ju sngewtynnad eh ban do ha lynti ban niah kali na kawei ka jaka sha kawei pat bad ioh ban kynduh iabki briew bapher ba pher. Kane ka lad ka la pynurlong ia ka jingthrang jong nga bad ka la ai ruh ianga ka lad ban ïeng hala ki kjat. Nga kwah ban ai jingmut ia ki para kynthei ba kwah ban kamai ja kpoh na ka kam ñiah kali ba haba phi thrang ka lad kan plie na bynta jong phi. Phin kynduh jingeh shibun, tangba haba don ka mon ka don ka lad” ong i Kong Joycy.
Ka Amazon ka la iateh lok bad kumba 500 ngut ki nongñiah trok ha India kiba pynpoi biang por bad pynpoi suk ia ki tiat jong ki customer. Ka kompeni ka ai ruh ia ki health bad accident insurance na ka bynta ki draibar jong ka. Shuh shuh ka la pyntreikam ia ki tiar teknology ban pynsuk bad pynshngaiñ ia ki draibar jong ka ha kaba ki kit tiar kylleng kylleng khlem da don jingwit.
U Venkatesh Tiwari, Director – Middle Mile Operations, Amazon India, u la ong “Ki draibar trok jong ngi ki long ki nong pyntyllun bad pynshad ia ki jingtreikam jong ka konpeni bad ka kompeni bad ki draibar ki la iatreilang ban pynlong ia ki program ban ai jinghikai kumno ban husiar haba ñiah ia ki kali bad ruh ban ai ia ka jingstad ha kaba iadei bad ka tip lad tip lynti por ba on ia ki tiar. I Joycy i la iashim bynta ha kine ki program bad i long kum kata ka nuksa ba khraw na bynta kiba kwah ban wad kam ha ki laiñ logistics. Ki briew kum i Kong Joycy ki long kum kita ki nonglam lynti ban pynurlong ia ka Atmanirbhar Bharat bad kyntiew ia ka”
Ka Amazon ka thong ban pynmih ia ki nongbat kam jong ka kiba khleh bad mih na kylleng ka pyrthei bad kyntiew ia ki kynthei ban trei ha ki tech department jong ka. Mynta ki kynthei ki long khlieh ha kiba bun ki kam ki jam ha ki tnat kum ka Amazon Fresh, AWS Public Sector, bad kiwei kiwei de.
