Shillong, Naitung 17: Ka Khasi Students’s Union (KSU) kum shibynta ban kynmaw ia ka lyngkhuh sngi iap ba 189 jong u Syiem Tirot Singh Syiem u ba long u Nongialeh laitlluid na Ri Lum khasi pyrshah ia ki bor jong ka Sorkar Phareng.
Kumta na ka liang ka seng KSU ha ryngkat bad kiwei kiwei pat ki kynhun sengbhalang mynta ka sngi ka 17 tarik u Naitung 202 ki la ioh ban leit ban buh syntiew ha khmat jong u mot sah kynmaw jong u Tirot Singh Syiem u ba don ha Madan Iewrynghep.
Ha ba ai jingkren ha kane ka sngi na ka liang u President jong ka KSU u bah Lambokstar Marngar u la ong ba ka seng kala beh krad ia palat 2500 ngut ki nongbylla bar jylla kiba wan rung be-ain khlem kot khlem sla sha Jylla, ha ka jingkhynra Labour Licence bad Work Permit da ka seng ha kylleng ki jaka ka Ri-lum Khasi Jaintia.
Ha kine ki 12 sngi bala leit noh. U la ongruh ba ngi kwah ruh ban tip ba haduh katno tylli ki case ba ka Sorkar kala mudui pyrshah ia ki nongbylla bar jylla ba khlem kot khlem sla bad kaei kaba kila leh pyrshah ia ki contractor kiba pynkhein ia ki Rules.
U bah Lambokstar Marngar ula pynbna ruh ia ka rai jong ka KSU ban nang pynkhlain ia ka jingkhynra kum ka dak ban pyrshah ia ka jingbym lah jong ka Sorkar Jylla ban pyntreikam ia ki ain kiba la don lypa ha Jylla kynthup ia ka Meghalaya Residents Safety & Security Act (MRSSA), 2016 nalor ban pynbor ia ka Sorkar Pdeng ban pyntreikam noh ia ka Inner Line Permit (ILP) ban pyrrkhing ia ka jingrung kyrthep ki bar jylla sha Jylla.
U la ong ruh ba ka KSU kan sa iakynduh shen bad kiwei ki para Sengbhalang ban shim rai halor kiwei pat ki sienjam ba dei ban shim ha kaban leh eiei halor kane ka mat kaba kongsan.
Ha kane ka sngi la ioh ruh ia ka jingkren na u President ka Hynniewtrep Integrated Territorial Organization (HITO) u bah Donbok Dkhar, Hynniewtrep National Youth Front (HNYF) u bah Sadon Blah, u president ka Jaintia Student Union (JSU) u bah Jersom Shylla, President Federation of Khasi Jaintia & Garo People (FKJGP) u bah Dundee Khngsit bad kiwei kiwei pat.
