Shillong, Nohprah 06: Ka la long ka jingpynpaw bieit ka bakhraw na ka liang u Governor badon burom jong ka Meghalaya, u Tathagata Roy, haba haduh mynta ruh um pat ai ia ka jingmynjur jong u halor ka jingpynkylla (amendment) ia ka MEGHALAYA RESIDENTS SAFETY AND SECURITY (AMENDMENT) ORDINANCE, 2019.
Ym tang ba ka pynpaw ia ka jingbym-shemphang jong u ia ka Constitution ka India, hynrei ka pynpaw kaba khlem da lah ban burieh ia ka jinglong shahliang (communalism) jong u kaba la pynlong ia u kat haduh ban ialeh pyrshah ia ka rai jong ka Cabinet jong ka Sorkar Meghalaya ha ki ar bynta.
Kawei ka jingkyntait ia ka jingbthah ka Sorkar ban wallam da ka Administrator Rule ha KHADC, bad kawei pat ka jingpynslem ban ai ia ka jingmynjur halor katei ka Ordinance, namar ha baroh ar tylli kine ki kam, ka don na sha lyndet ka jingtrei-borbah ki heh-paid ka India kiba ha Shillong kaba ngi tip shai kdar ba kim ialeh pyrshah shuh ia ngi da ka bor kum ha ki por mynshwa (1979) hynrei ki trei napoh da kum kine ki lynti. Kane ka dei kata kaba ki ong ka OPEN SECRET.
Ha ka Constitution ka India ngi tip shai kdar ba ka treikam KA JINGPYRKHING BASHONG-NIA (Reasonable Restriction) kumba la thoh shai kdar ha ka Article 19 (5) bad 29 jong ka Constitution ka India : Quote “Nothing in 2[sub-clauses (d) and (3)] of the said clause shall affect the operation of any existing law in so far as it imposes, or prevent the State from making any law imposing, REASONABLE RESTRICTIONS on the exercise of any rights conferred by the said sub-clauses either in the interests of the general public for the for the protection of the interests of any Scheduled Tribe.”
Ka klos (d) ka thoh kumne Quote “to move freely throughout the territory of India;” Unquote ka klos (e) ka thoh kumne Quote “to reside and settle in any part of the territory of India;” Unquote Ka Article 29 ka thoh kumne Quote – “Cultural and Educational Rights : 29. Protection of interest of minorities. – (1) Any section of the citizens residing in the territory of India or any part thereof having a distrinct language, script or culture of its own shall have the right to conserve the same.” Unquote
Ka Meghalaya Transfer of Land Act, 1971 kaba ha ka jingshisha ka long pyrshah ia katei ka klos (d) jong ka Article 19, hynrei la shah ia ka namar la niew ia ba ka dei ka Jing-pyrkhing Bashongnia (Reasoble Restriction) ban ia da ia ngi ki Scheduled Tribe ha Meghalaya, kata, da kaba phai sha ka Article 19 (5) bad Article 29 (1).
Kumjuh ruh mynta ka MEGHALAYA RESIDENTS SAFETY AND SECURITY (AMENDMENT) ORDINANCE, 2019 ka long pyrshah ia ka klos (e) jong ka Article 19 ka Constitution ka India, hynrei namar ba la thaw ia ka na ka bynta ban iada ia ngi ki Scheduled Tribe ha Meghalaya, ka long bieit bad paw bieit palat ia u Governor ka Meghalaya wat tang ban pynslem kumne ban soi ia katei ka Ordinance. Ki Jylla kum ka Arunachal Pradesh, Mizoram, Nagaland, Manipur ki la ioh syndon da ka ILP naduh mynshwa, hynrei ia ngi ha Meghalaya ngi dang sdang tang da kane ka MRSSO 2019 kaba long tang kum ka syrngiew jong ka ILP ruh, une u Governor uba mynta, u Tagatha Roy, u dang pynslem.
Namar ar tylli ki jingma kiba ap ia ngi mynta, ka jingwad jaka rieh jong ki 40 lak ki bym dei ki nong-India kiba la shem ha Assam, ki la nang bsut sha Meghalaya kum ki nongwad dawai ne shah sumar ha NEIGHRIMS dang step phyrngab bad man la ka sngi ki wan da ki bus na Assam; nangta sa kita ki heh-paid ki ban dang wan na Afghanistan, Pakistan, Bangladesh ynda la dep mynjur ka Parliament ia ka CAB.
Ka la dei ia ngi ban dawa ban weng noh ia une u Governor u bym sngewthuh ia kane ka hok ba ka Constitution ka India ka ai ia ngi ki rit-paid (minority), ngi ki Khasi-Pnar bad Garo ngim dei tang ki rit-paid (minority) hynrei ngi la dei ki ban sa duh-jaid namar ka jingshong-kha khleh bad ki heh-paid ka la jan long kumba sar ka khlam! Namar-kata, ngim banse ban dawa ban ioh noh da u Governor u bym long communal bad u bym long Anti-Constitutional hynrei da uba long Pro-Tribal bad Constitutional.
Kumta, nga kyrpad da kaba sngewrit ia ki Seng Bhalang baroh ban klet ia kano kano ruh ka jingiapher jingmut ban khot ia ka jingialang paidbah kloi kloi khlem da pynslem ban pynpaw ia ka jingsngewpyrshah jong ngi ia u Governor uba mynta halro kitei ki daw bad ba ka Sorkar India badonburom hapoh ka jingialam bastad jong u Hon’ble Prime Minister, Narendra Modiji, ban weng noh shisyndon ia u Tagatha Roy kum u Governor ka Meghgalaya bad wan rad da uwei pat u Governor lada ioh da u Tribal kan bha shibun. Kane ka long katkum ka jingthoh kaba la phah da u Bah HS Shylla CEM barim ka KHDC.
