New Delhi, Naitung 05: U myntri rangbah duh jong ka Ri India u Narendra Modi mynta ka sngi u la ai ka jingiaroh ia ka rukom wan raha ia ka mang tyngka mynta ka sngi na ka bynta u snem 2019-2020 na ka bynta ban tei ia ka India kaba thymmai.
Ha ka jingpynliat khubor ha dien ba la dep ban wanrah ia ka mang tyngka mynta ka sngi ha Parliament da ka myntri ba dei peit ia ka pla tyngka jong ka sorkar pdeng, u la ong ba kane ka mang tyngka kan pynkhlain ia ki ba duk ba rangli bad kan plie lad ia ki samla kane ka Ri.
Haba kren ia kaei kaba ki paidbah kin ioh ia ki jingmyntoi na kane ka mang tyngka, u la ong ba kane ka mang tyngka kan kyntiew ia ka ioh ka kot jong kito kiba dang duna ka jingioh kan pynsuk ia ka rukom siew ia ka khajna bad kan wanrah ia ki jingkylla ha ki jingtei ha ka ri, la ong u myntri rangbah duh jong ka Ri.
U Myntri rangbah duh jong ka Ri u Narendra Modi u la ong ba kane kan dang pynkhlain shuh shuh ia ka rukom seng kam seng jam, kan dang pynkhlain shuh shuh ia ka jingiashim bynta jong ki kynthei ha ki kam pynroi jong ka Ri bad kane ka mang tyngka kala pruid dak kumno ban wan rah ka jingkylla ha ka rep ka riang hapoh jong ka Ri.
Na ka liang jong u myntri rangbah duh jong ka Ri, u la ong ba kane ka mang tyngka 2019-2020 ka dei ka mang tyngka kaba don shibun ka jingkyrmen ban kyntiew ia ka Ri ha kane ka spah snem kaba 21st.
Ka sorkar pdeng kala shim na baroh ki liang ban kyntiew ia ka Ri, naduh ka jingaibor ia ki nongrep, kiba duk ba rangli, ki rit paid kiba la shah ban bein baroh shikatta, kine ki long ka bor ia ka Ri ban pynkiew ia ka ioh ka kot sha ka sha ka san trillion ha kine ki san snem ban wan, ong u myntri rangbah duh jong ka Ri u Narendra Modi.
