Shillong, Nailur 08: U Shongknor jong ka kynhun Meghalaya Democratic Alliance (MDA) u Conrad K Sangma u ba dei ruh u myntri rangbah ka jylla u la ong ba ha kane ka jingialang jong ka MDA mynta ka sngi la shim ia ka rai ban pynthikna ban pynrem ia ka “Resolution” ba wanrah ka congress pyrshah ia lamphang ka iing dorbar.
Haba kren ha ki lat pathai khubor u myntri rangbah ka jylla u la ong ba kane ka jingialang kaba la long mynta ka sngi kadei kaba ki juh pynlong shi sngi shuwa ban sdang ka jingiashong dorbar jong ka iing dorbar, ha kane ka jingialang baroh ki party kiba don ha kane ka sorkar MDA kila ia don lang.
La batai ba ha kane ka jingialang kila ia kren ia kaei ki mat ia kren ki ban sa wan hapoh ka iing dorbar thwain ka jylla bad kum ka kynhun kumno kin iaid shakhmat ha kane ka dorbar synrai ka ban sdang ha ka sngi Thohdieng.
Ha kane ka jingialang la batai ruh ia ki rule bapher bapher ba kumno kin iaid hapoh ka iing dorbar, la ia kren ruh ia ka shongsuk shong sain ha ka jylla, la ia kren ia kaei kaba jia hapoh ka jylla, ha kane ka jingialang kum ka kynhun kila shim ia ka rai ban pynthikna ban pynrem ia ka resolution ka party Congress.
