Shillong, Naiwieng 21: U Myntri Sorkar Pdeng ba dei khmih ia ka tnat Education, Skill Development bad Entrepreneurship, u DharmendraPradhan u la plié ia ka Kendriya Hindi Sansthan ba dang shudep shna ha Mawdiangdiang, East Khasi Hills mynta ka sngi.
U myntri Rangbah ka Jylla Meghalaya, u Conrad K Sangma u la iadonlang ha kane ka prokram. U Myntri Sorkar Pdeng u la ai khubleiia ka Sorkar Meghalaya kaba la ai jingiarap kaba kynthup ruh ia ka jingpynbiang ia ka jaka ban sdang ia kane ka jaka pule ha Mawdiangdiang, Meghalaya.
U la ong ba kane kan ai jingiarap bha ia ki nonghikai Hindi bad ruh ia kito kiba thrang ban wad bniah ia ki kam kiba iadei bad ka Hindi. Kane ka jaka pule kan long na ka bynta ki briew kiba wan na Meghalaya, Tripura bad Mizoram.
U Myntri Sorkar Pdeng u la ong ruh ba ka NEP 2020 ka dei ka lad ban wanrah ia ki jingkylla ha ki kam ai jinghikai ha ka ri bad ba kane kan don jingktah sha baroh ki jaka nongkyndong ruh.
U la ong ruh ba kawei na ki bynta kiba kongsan tam jong ka NEP ka dei ba ka ban jur halor ka jingai jinghikai da kaba pyndonkam ia ka ktien tynrai ha ki klas kiba rit. U la ong ba ka Sorkar ka dang pyrshang ban pynurlong ia kane hapoh ka por ba la buh.
U Myntri Sorkar Pdeng u la pdiang ruh ba ki don shibun ki jingiapher ha ka kolshor, ka ktien bad ki dustur ha kane ka ri. Hynrei u la ong ba ka dei namar kine ki jingiapher ba ki briew ki lah ban iasamkylliang ia kine baroh.
U Myntri u la ong ba dei ban pyndonkam ia ka teknoloji ban pynneh bad kyntiew ia ki ktien tynrai khnang ba ki briew kin lah ban pyndonkam ia ka bor internet ha ki ktien tynrai lajong bad ruh ba kane kan plié lad ia kiwei kiwei ki briew na kiwei kiwei ki jaka jong ka pyrthei ba kin ioh jingtip shaphang ka kolshor bad ki dustur jong ngi.
Kine baroh kin kyntiew ia ka jingsaindur thymmai ha ki samla bad pyni ia ka pyrthei baroh kawei ia ki jinglong jingman kiba iadei bad ki, la bynrap u Myntri. U la ong ruh ba kane ka thain shateilammihngi ka long kaba riewspah bha ha ka liang jong ka kolshor bad u la ong.
“Ki don shibun kieikiei ba ngi lah ban nang na kane ka thain, ka don ki dustur kiba khlain bad ka don ruh shibun ki jingdon jingem ba la ai da ka mariang. Ki don shibun ki jaka pule ba tbit ha kane ka thain kaba kynthup ruh ia ka IIM.”
U Myntri u la ong ba ki don shibun ki lad ia ki samla na kane ka thain bad u la kyntu ia baroh ba kin pynthikna ba ki samla ki ioh ia ka jinglong jingman kaba biang.
“Ki don kiba la iathuh ia nga ba ka Meghalaya ka don kumba 3.5 lak ngut ki samla kiba pule ha ki kolej bapher bapherbad ka dei ka kamram jong baroh ban pynthikna ia ka jinglong jingman kaba biang kaban kyntiew ia ka pule puthi, ka jingpyntbit, ka jingkyntiew ia ki lad ioh kam bad ka jingpynshlur ia ki ban long kiba wad bniah. Ka sienjam kaba nyngkongna ka bynta kane ka dei ka jingpynsuk ha ka ktien ba ai jinghikai ia ki.”
U Myntri u la kren ruh shaphang ka North-East Education Conclave kaba la pynlong ha Guwahati ha ka sngi Saitjain bad u la ong ba ka thain Shatei Lam Mihngi ka don kumba 180 tylli ki jait ktien bad ba ka dei ka kam jong ka NEP ban kyntiew ia kine baroh.
Ha ki por ban wan, ka Kendriya Hindi Sansthan bad ka English & Foreign Languages University (EFLU) kin treikam kum ki Centre of Excellence bad kin iasnoh kti bad ka Sorkar Meghalaya ban pynneh bad pynkhlain ia ki ktien Khasi, Garo bad Jaintia lyngba ka jingpyndonkam ia ka teknoloji, la ong u Myntri.
U Myntri u la ong ba ka ktien ka dei kaba wanrah ia ka jingpyniasoh hapdeng ki briew na kylleng ka pyrthei bad ba ka jingdon ia ki app ha ka internet ban nang ia ki ktien jong kane ka thain kan plié lad ia ki briew nabar ba kin sngewthuh ia ka kolshor bad ki dustur jong ka thain.
Ha kane ka sngi, u Myntri u la pyllait ruh ia ar tylli ki kot – ka SamànvayPurvottarSanchayan bad ka Hindi-Khasi-Garo-Jaintia-English Concise Dictionary. U Myntri u la ai jingiarohia kane ka Concise Dictionary bad u la ong ba kane kan iarap bha ban kyntiew ia jkine ki ktien.
U Myntri Rangbah ka Meghalaya, u Conrad K Sangma u la ong ba u dap da ka jingkmen halor ka jingplie ia ka Kendriya Hindi Sansthan ha kane ka jylla da kaba bynrap ba ka jingdon jong kane ka jaka pule kan iarap ia ki samla na Meghalaya bad na ka thain Shatei Lam Mihngi ba kin nang ia ka ktien Hindi.
U Myntri ka Sorkar Meghalaya uba khmih ia ka tnat pule puthi, u LahkmenRymbui, u nonghikai ba tbituba long ruh uwei na ki nongseng ia ka Sanskrit Bharati, u Chamu Krishna Shastry, ka Director jong ka Kendriya Hindi Sansthan, Prof Beena Sharma bad ki ophisar ka Sorkar Pdeng bad ka Sorkar Jylla ki la iadon lang ha kane ka prokram.
