Shillong, Naitung 04: Lyngba ka jingdon ki nongpang kiba la koit noh kaba la kot haduh 91% bad tang 3 tylli ki case COVID-19 kiba dang iaid mynta (haduh ka 26 tarik u Jylliew, 2020), ka Meghalaya ka la lah ban iakhun pyrshah ia ka khlam COVID-19 da kaba shim ia kane kum ka thong hakhmat ki lad sumar nongpang.
Ha ka por ba ki ri ha kylleng ka pyrthei ki shem jingeh ban pynduna ka jingktah jong kane ka khlam, kane ka jylla jong ka thain shatei lam mihngi ka la ioh mad katto katne ka jingjop.
Ka Meghalaya ka la pyntreikam ia ka rukom ialeh pyrshah ia kane ka khlam kaba don lai bynta – ka jingwad ia ki briew kiba wanrah ia kane ka jingpang, ka jingpynkhlain ia ki lad sumar nongpang bad ka jingkyntiew ia ka jinglah jong ka imlang sahlang ba kan ialeh pyrshah ia kane ka khlam.
Ban ioh ia ka nam kum ka jylla kaba bun tam ki nongpang kiba la ioh jingkoit ha kane ka ri, ka Meghalaya ka la pyntreikam ia lai tylli ki sienjam shuwa ban lap ia u nongpang COVID-19 uba nyngkong ha ka jylla – ka jingpyndonkam ia ka rukom khein SIER ba la shna ha ka jingiatrei lang bad ka Indian Institute of Public Health (IIPH), Shillong.
Ban sngewthuh ia ka jingantad lypa bad ka jingpynkhreh, ka jingpynsaphriang jingtip shaphang kane ka jingpang hapdeng ki nongshong shnong bad ka jingpyntrei kam ia ka State Response Team (SRT) ban peit bniah ia ki kam ba iadei bad kane ka khlam.
Ki sienjam ba lai bynta, ka dei ka jingwad bniah ia ki nongwanrah ia kane ka jingpang, Ka Meghalaya ka la pyntreikam ia ka rukom peit bniah ia man u briew uba wan rung sha ka jylla ha kane ka por jong kane ka khlam. La pyndonkam bha ia ka teknoloji ha kane ka kam bad kumta la saindur bad la wanrah ia ka rukom treikam kaba bun bynta ha kane ka kam.
Ka jylla ka la plié lad ba ki briew kiba wan sha ka jylla kin lah ban pynrung kyrteng lypa shuwa ban poi. Ia baroh ki jingtip la lum bad buh ha ka database bad ka jylla ka lah ban sngewthuh katno ngut ki briew kin wan. Ki briew ki hap ban pynrung kyrteng ialade da kaba phone sha 108 ne pynrung kyrteng online ha ka http://meghalayaonline.gov.in/covid/login.htm.
La pyntreikam ia ka rukom screen kaba khlain mar syn rung ki briew hapoh jylla bad hadien kane la leh ia ka RT-PCR (reverse transcription polymerase chain reaction) ha ka por ba ki dang shah pynshong marwei (institutional quarantine). Hadien kane, la sdang ia ka jingwad ia ki briew kiba don jingiadei bad ki nongwan bad ynda la pynthikna ba kim don jingpang, la phah ba kin shong marwei shuwa ha la iing (home quarantine).
Lyngba ka IVRS (Interactive Voice Response System), ka don ka jingpeit bniah ia ki nongwan haduh 14 sngi ha kaba ki nongsumar nongpang ki leit ruh sha ki iing jong kine kiba wanphai khnang ban ioh jingtip ba kham bniah halor ka koit ka khiah jong ki. Ka jylla ka la pyndonkam ia ka Geo-Fencing App ban wad ia kito kiba la pynkhein ia ki kyndon ba iadei bad ka jinghap shong shuwa marwei.
Ia palat 120 tylli ki Corona Care Centre bad hospital la peit bniah da ki ophisar lyngba ka Corona Care Management (CCM) Application, kaba buddien ia ki briew kiba don jingma ban ioh ia kane ka jingpang bad kito kiba la pynthikna ba don kane ka jingpang naduh ka por ba ki pynrung kyrteng ialade ha ki hospital ne ki jaka sumar haduh ban da pyllait ia ki ban leit phai sha la iing.
Ia baroh kine ki jingtip la lum ha ka Integrated Multi-Dimensional Response System, Sankalp dashboard. Ia kine baroh la pyndonkam ban peit ia ka jingbun ki dak jingpang, ban ithuh ia ki cluster, ban ithuh ia ki briew kiba don ki dak jingpang kiba khie shi khie, ban tip katno ngut ki briew ki dang don hapoh ka jingpynsah marwei bad ban peit ia ki jingdonkam.
Ka jingpynkhlain ia ki lad sumar nongpang, Ka rukom pyntreikam jong ka Meghalaya ia ka jingantad lypa bad ka jingpynkhreh ka la wanrah ia ka jingpeit bniah ia ka jingdonkam ban pynkhlain ia ki lad sumar nongpang bad hadien kane, ka jylla ka la shim ia ki sienjam ban pynkup bor ia ki jaka sumar khnang ba kin lah ban ialeh pyrshah ia kano kano ka jingeh.
Kum ban shu kdew, ka jingdon ki ventilator ka la kiew na ka saw tylli haduh 71 tylli mynta. Ka la pynbiang ruh ia ki jingdonkam haba sumar ia saw jait ki nongpang – ki bym don dak jingpang ne Category A, kiba duna dak jingpang ne Category B, kiba bun dak jingpang ne Category C bad kiba khlain bha ki dak jingpang ne Category D.
Nalor ka jingshah pynshong marwei ha la iing (home quarantine) ia ki briew, ka Sorkar ka la plié lad ruh na ka bynta ka jingpynshong marwei ha ki Corona Care Centre ha ka nongbah Shillong bad Tura na ka bynta kito ki bym don jaka ha la iing ban leh ia kane ka kam.
Sa kawei pat ka sienjam kaba phylla ka long ka jingsdang ia ki Community Quarantine Centre ba la sdang da ki shnong. Ki shnong bad ki dong bapher bapher ki shimti ia ki jaka ba lait bad ki pynbiang ia ki jaka shong marwei ia kito ki bym lah ba leh ia kane ha la ing.
Khnang ban lait na ka jingkiew stet kane ka khlam, ka Meghalaya ka la kyntiew ia ka jingtest sha ka 400 tylli ki test shi sngi bad 2000 tylli ki test shi sngi ha kaba iadei bad ka pool testing. Don ar tylli ki jaka test ba dang treikam ha ka jylla kaba long ka NEIGRIHMS bad ka jaka test ha Tura. Dang trei ban wanrah sa ia ka Pasteur Institute hapoh kane ka thup.
Ka jingpynkup bor ia ka imlang sahlang, Ka jingiatrei lang jong ka imlang sahlang ban ialeh pyrshah ia kane ka khlam ka long kaba khlain bha. Ka jingpynbiang jingtip ha ki shnong bad ki dong ka long kaba shai bad kane ka la ialam sha ka jingduna ka jingpur jong kane ka khlam ha Meghalaya.
Ki bor distrik ki pynlong ki jingialang ba man ka por bad ki Rangbah Shnong katba ki Block Development Officer pat ki leit sha ki shnong ban kyntiew ia ka jingtip bad ai jingkyrshan ia ki sienjam ba shim ha ki shnong ha kylleng ka jylla. La sdang ia kumba 7000 tylli ki Community COVID Management Committee (CCMC) ha kylleng ka jylla bad kine ki kyntiew ia ka jingtip shaphang une u khniang jingpang.
La dep jied ia ki Community Health Activist (CHA) na ki SHG ki bapher bapher bad kine ha ka jingtrei lang bad ki ASHA ki la ai jinghikai ia kito kiba don jingma ban ioh ia kane ka jingpang kum ki tymmen bad ki briew kiba la don lypa ki jingpang. Ki leh lai tylli ki kam ba kham kongsan – ka jingkyntiew jingtip shaphang une u khniang jingpang, ka jingiarap ban peit ia ka jinglong jingman bad ka jingiarap pyniaid ia ki community quarantine centre.
Ka jingsdang ia ka Constitution of Behavioural Change Management Committees (BCMC) ban wanrah ia ka jingkylla ha ka rukom im khnang ban lah ban im da ka jingshngain ha kane ka por COVID-19 ka la iarap bha.
Ka ‘Behaviour Change Model for living with COVID-19’ ka khein beit ba man u briew u lah ban dei u nongpang COVID-19 bad lyngba kane, man u briew u long uba bahkhlieh hi ban bat ia ka jingpynjngai iwei na iwei, ka jingpyndonkam ia ki jingda khmat bad ka jinglehkhuid bad ka jingsait man ka por ia ki kti
Ia kine ki sienjam ba don lai bynta jong ka Sorkar ki la long kiba jop namar ka jingpyntrei kam ia ki ha ka por kaba biang lyngba ka teknoloji ban pynthikna ka jingbud ryntih ia ki jingbthah bad ki hukum halor ka COVID-19. Ka Meghalaya ka la shim kabu ia ki jingshem thymmai da kaba sdang ia ki lad telemedicine ha NEIGRIHMS, Shillong.
Namar jong ka khlam COVID-19 la shem ba ki don ki jingiapher ha ka rukom wad jingsumar da ki briew bad ba ka don ka jingartatien ha ki nongpang ba kin leit sha ki hospital, kane ka la ialam sha ka jingeh bad ka jinghiar ha ka koit ka khiah jong ki briew tang namar ba ki pynslem ban leit sha hospital.
Ka rukom treikam ha ka jylla ha kaba la sam ia ki kam sha ki distrik ka la iarap bha ha ka jingialeh pyrshah ia ka khlam COVID-19. Ki jingai jingtip ba shai lyngba ki jingiaphylliew jingmut hapdeng ki Deputy Commissioner bad ka State Response Team, ha ryngkat ki jingiakynduh jong ka kynhun Myntri jong ka jylla ka la plié lad ba don ka jingai jingtip kaba kloi bad kaba stet.
Ka jingiasam jingtip bad ka Assam halor ki rukom ba biang tam ha ka jingialeh pyrshah ia ka khlam COVID-19 ka dei sa kawei ka bynta kaba la iarap bha ia ka Meghalaya.
