Shillong, Nohprah 02: Ka Meghalaya Idol Season – I kaba long kawei na ki rynsan paidbah ba la pyniaid da ka Meghalaya United & Social Organisation (MUSO) ka la pynkhreh mynta shaid shaid ban pynlong ia jingiakob pyni sap ki samla jong ka jylla Meghalaya ha ka rwai ka siaw.
La sdang ia ka jingsngap thuh ia ka rukom rwai ia katei ka rynsan pyni sap rwai paidbah da ka MUSO hynnin ka Sngi Saitjaiñ ha Bhoirymbong, Ri-Bhoi district, kaba bun ngut ki samla na ka thaiñ Bhoirymbong, khamtam kiba dei na ka Bhoirymbong C & RD Block ki la shim bynta shitrhem ban ioh rung sha katei ka rynsan hadien ba la jied ia ki da ki nongbishar (judge) ka ban sa long ha Nongbah Shillong.
Ka MUSO ka pyntip ruh ba ia ka jingsngap thuh ne ka audition ban bud ha kylleng ka jylla, la pynbeit ba ha ka 4 tarik Nohprah yn pynlong ha Nongpoh, Sajer Hall, Ri-Bhoi district bad kiwei pat ki prokram ban bud kin long sa ha Khliehriat, Jowai, Nongstoin, Mawkyrwat, Dawki, Pynursla, Sohra, Mairang, Mawsynram, Tura bad yn pynkut ia ka ha ka 29 tarik Nohprah, 2018 ha Shillong.
Kito kiba la ioh rung sha ka rynsan hadien ba la jied ia ki, la pynbeit ba kan don kyrdan pa kyrdan ki rukom shim bynta, kata ka long ba kito kiba la shim bynta kyllum kin shah jied ban rung sha ka Quarter Final, bud nangta sa ha ka Semi Final bad khatduh eh ka Final bad la pyntip ruh ba na ka bynta ki bym shym la iohlad ban rung ha ki audition ha ki jaka ba ki don, ki lah ban wan shim bynta ha kiwei ki prokram audition ha ki district lane ha Shillong.
Ka MUSO lyngba u Bah A Jyrwa, President bad ka Kong N Shadap, Secretary ki la iathuh ba ha katei ka rynsan pyni sap paidbah ha ka rwai ka siaw, ia kaba la tip kum ka Meghalaya Idol Season – I, la ailad ia ki samla ba kin rwai ia ki jingrwai shimet (solo) lane kynhun.
Ki jingrwai ba ki lah ban rwai la ailad ba kin long ha ka ktien Hindi, Phareng, Khasi, Garo bad Pnar bad lait na kitei ki kyntien jingrwai, yn ym shah da kiwei pat ki kyntien bym lah ban sngewthuh paidbah.
Ki nongshim bynta kiba kwah ban rwai ki dei ban pynshisha da ki EPIC (Electors’ Photo Idendity Card) bad lada ki dei kiba dang rit ka rta bad bym pat ioh ban thep vote ki dei ban phah da ki EPIC jong ki kmie ki kpa jong ki tangba ki EPIC ki dei ban long kiba la dep xerox.
Ka bai rung man la uwei pa uwei u nongshim bynta ka long T.100/- shi khlieh lane kynhun bad kito kiba la iong ban rung sha ka rynsan paidbah ban sa pynlong ha Nongbah Shillong, ka jingpyntip na ka bynta ka khusnam ba kin ioh ka long ba na ka bynta ka Lahduh kan khur ia ka song pisa ba T.1,50,000/-, kaba wan ba ar kan khur ia ka song pisa ba T.70,000/- bad kaba wan ba lai kan khur ia ka song pisa ba T.50,000/- , kin don ruh sa san tylli ki consolation prize nalor kitei ki lai tylli ki kyrdan ba shakhmat.
