Shillong 29 Iaiong: U state president jong ka ka Nationalist People Party (NPP), Meghalaya u Dr W.R Kharlukhi u la kyntait war ia ka jingtei pop ka Congress, ba ka NPP ka long kum u suri kup snieh langbrot.
Ka Congress ka la kynnoh ba ka NPP ka dei tang u suri kup snieh langbrot hadien ba u President ka NPP u Conrad K Sangma, u la leit synran ia u Myntri Rangbahduh ka ri, u Narendra Modi ha ka por ba u thep kyrteng kum u kyrtong MP na Varanasi Parliamentary constituency, ha Utter Pradesh dang shen.
U Dr WR Kharlukhi u la ong ban a duh bas dang ka NPP kam ju deng dur bula ne suri kup snieh langbrot, ki juh kren shai ba ki dei ka bynta jong ka NDA, dei na ka jingpyrshah jong ka NPP ba ka BJP ka khlem wan rah shuh Citizenship Amendment Bill (CAB) 2016.
Kala paw shai na ka jingialang baroh ki seng na ka dong mihngi hapoh ka jingialam u Conrad K Sangma ha Guwahati, ka la rai ban pyrshah ia ka CAB bad ha ka 9 tarik Rymphang, ka jingialang bah ka NPP, ka la shim ia ka rai ba lada pynurlong kam ia ka CAB, yn weng noh na ka NDA.
Hynrei namar ba ka BJP kam shym la pynlong ain ia ka CAB ha Rajya Sabha, ka NPP ka la rai ban don bad ka NDA. Te kam don kano kano ka jingong ba ngi rieh ne suri kup snieh langbrot”, u la bynrap.
