Shillong, Risaw 18: U Nongialam jong ka seng NPP u Bah Prestone Tynsong u la ong ba ka NPP haduh mynta kam pat ia shong ban ia kren halor ka kam MP ilekshon ka ban sa long ha u snem 2019.
Haba kren ha ki lad pathai khubor mynta ka sngi u Bah Tynsong u la ong ba haduh mynta kam pat don kano kano ka jingiakren ha kaba ia dei bad u kyrtong MP, da ladei ka por ka seng kan sa ia kren bad ban shim ia ka rai.
U bah Tynsong u la kren shai ba haduh mynta kam pat don kano kano ka jingiakren bad ki seng kiba ia don lang, la ong ba ynda la dei ka por kin sa ia shong lang bad kin sa ia shim ia ka rai hynrei haduh mynta kam pat don kano kano ka jingiakren ban ia ong ia ai ia kata ia shim ia kata.
Haba ia dei bad ka jingmut ban ong ban buh ia u kyrtong kaba ia mon lang, u bah Prestone u la ong ba wat ma u ruh u sngewtynnad tang ba ki hap ban ia shong lang baroh kiba ia don lang ha ka sorkar bad ha dien kata kin sa ia shim ia ka rai.
Halor ka jingtyrwa ka UDP, u Tynsong u la ong ba kala don lypa ka MDA bad ha kane ki lah ban ia kren bad kin sa kren. Kumba ka long mynta ka dang mih tang na ka UDP, kiwei ki party kum ka HSPDP bad ka PDF kam pat don wat na ka liang jong ka NPP ruh kam pat ia kren.
