Shillong,Lber 13:U Myntri ba dei peit ia ka tnad PWD u bah Prestone Tynsong symbud myntri rangbah haba jubab ia ka jingkylli u bah H.S Kharpran la ong ba ka surok na Happy Valley sha Mawshabuit ka dei jong ka PWD dei tang 600 meter ka hap ha ka jaka jong ki shipai Gorkha Training Centre.
Haba jubab ia ki jingkylli bynrap na ka liang jong ka district administration haba ka la peit bniah ia ki kot ki sla ba iadei bad kane ka surok la shem ba kala don ka jingpynbna sorkar ha u snem 1972 ba kane ka jaka 600 meter ka hap ha ka jaka jong ki shipai.
U Myntri ka tnad shna surok u la pyntip hapoh ka iing dorbar ba na ka liang jong ka sorkar ka kwah ban weng ia kane ka jingeh kaba ki paidbah ki ia kynduh haba leit ba wan lyngba kane ka surok,kumta ka sorkar kala pynkhreh ban shna surok thymmai na Mawlyngat sha Mawshabuit,sha Mawlynrei bad mih sha Mawkasiang.
Haba iadei bad kane u myntri u la pan ia ka jingiatreilang na u MLA jong kane ka jaka ban ioh jaka ban shna surok thymmai khlem da iaid shuh lyngba kane ka surok kaba mynta,u MLA jong kane ka jaka la ai ka jingkular ban iatreilang ban pynioh jaka ban shna ia ka surok.
