Shillong, Rymphang 25: U Shongknor ka Lok Sabha u Om Birla mynta ka sngi u la ai jingkren hapoh ka iing dorbar thawain ka jylla bad ha ka jingkren jong u la ba ka jylla Meghalaya ka long ka jylla kaba i tynnad ym tang ha North East, hynrei ha khmat ka Ri baroh kawei bad ka jylla kan da rakhe ia ka jingdap 50 snem ha u snem ban wan bad u ai khublei lpa ia ki paidbah ka jylla.
Ha kane ka sngi u la pynkynmaw ba u P A Sangma bam kwai ha dwar u blei u la long u shongknor jong ka Lok Sabha bad u la rah burom shisha ia ka iing dorbar ha ka por jong u bad u la noh syniang shi katdei eh ban pynkhlain ia ka synshar paidbah ka long shisha ka burom bad ka nuksa ia ki ban dang wan ha dien.
Haba phai sha ka synshar khaddar ha kane ka Ri India, u shongknor ka iing dorbar thawain ka Ri India u la ong ba ka thymmei ha ka synshar khaddar ha ka Ri India naduh ba ioh ia ka jinglaitluid ka dei ka Synshar paidbah bad kane ka long ka nongmuna ha khmat ka pyrthei ha ka synshar paidbah.
U Shongknor, u la ong ba ka jingdon ki iing dorbar kum ka Parliament, ki Assembly bad ki iing dorbar dorbar kim ki District Council bad ki Panchyats katkum ki jaka ki long shisha ki jaka kyntang ha ka synshar paidbah namar lyngba jong kine ki jaka ba ki paidbah ki khmih lynti na ki nongmih khmat ban leh ei ei na ka bynta ka bha ka miat ki paidbah.
La ong ba ha ka por ba don ka jingiatania ka lah ban don ka jingiapher jingmut hynrei kane baroh ka long na ka bynta ban kyntiew ia ki paidbah jong ka Ri kaba ki mih khmat ,ha ka jingkren la kdew ruh ia ka jingpyndon kam ki kor kibor kiba katkum kane ka juk kaba mynta ha kaba pyniaid ia ka iing dorbar kum ka e-Parliament bad ka e-Office kane ka iarap ia ki dkhot ka iing dorbar.
Haba phai sha ka iing dorba rthawian ka jylla Meghalaya la ong ba ka jingtrei ka la iaid sha khmat bad ka dur jong ka iing dorbar ka long shisha kaba itynnad bad shen ka jylla kan sa ioh ia ka iing dorbar ba pura ha dien 20 snem. U Shongknor u kyntu ia baroh ban ia trei lang na ka bynta ban kyntiew ia ka Ri bad ka jylla ha baroh ki liang.
