Shillong, Nailar 08: U Myntri Rangbah ka jylla u Cornad K Sangma u la plie ia ka “College of Nursing ha Dr H Gordon Roberts Hospital Shillong” kane ka College kan sdang naduh mynta ka snem bad kan pdiang 40 ngut ki samla pule.
Haba kren ha kane ka jingplie ia kane ka ‘Nursing College’ u mytnri rangbah la ong kan bha lada ka jinghikai kan long kaba ia ryngkatdor katkum ka jingdawa jong ka pyrthei namar tang ka Ri Japan bad Thailand ka don kam shibun Nurse tang ha kitei ki ar tylli ki ri.
Ban kham pynsuk ban sngewthuh ia ka ktien kan bha lada ha ki lai ne saw snem jong ka jingpule lah ban hikai ia ka ktien japan lane ia kiwei ki ktien namar da kaba nang ia ka ktien kan suk ha kaba ioh kam ioh jam, kan long ka jingeh ia ka Ri India bad ia ka jylla ruh ban pynbiang kam hyrnei da kaba nang ia ktien kan suk ban ioh kam sha bar jong ka Ri India.
Haba phai sha kane ka Nursing College kaba la plie mynta ka sngi, u myntri rangba ka jylla la ong ba ha kine ki shispah snem kiba la leit noh ia kane jaka pule nurse ha kane ka hospital Dr H Gordon Roberts Hospital ki don tang ar ngut bad ka long ka jingsatong ba la lah ban plie ia kane ka Nursing College mynta ka sngi ha kaba ka jylla ka dap 50 snem.
Ha ka juh ka por u myntri rangbah ka jylla u la buh ia ka symboh pyrkhat ha khmat jong ki nognpyniaid ia kane ka Nursing College ba kin ai jinghikai ym tang ha ka jingpule hyrnei kan long ruh ba kin don ha ki ia ka mynsiem iarap para briew kane ka ktah ia ka jingim jong ki para briew.
U Mytnri Rangbah u la ong ba ka jylla ka don kumba khatsan lak ngut ki khun samla kiba hapoh ka khatsan snem bad ia kine lah ban pynrung kam ha ki jaka treikam bapher bapher kum ha ka Ri Japan, Thailand ha kaba ha kine ki ri ka jingdon ki khun samla kala dang hiar bad sdang ban bun sa ki tynmen, na ka liang jong u mytnri rangbah ka jylla u la pynbna ruh ba ka sorkar kan sa ai ka jingkyrshan ia kane ka jaka pule Nurse.
Ha kane ka sngi u myntri ka tnad pule puthi ka jylla bah Lahkmen Rymbui ha ka jingkren jong u la ai ka jigniaroh ia kane ka Hospital kaba la shim ia kne ka sien jam kaba eh ban sdang ia ka Nursing College la ong ba kane kan long ka jingkyrkhu ym tang ia ka Hospital hynrei ia ka jylla baroh kawei.
Ha kane ka sngi la don lang ruh u bah Adelbert Nongrum MLA, bah Mohendro Rapsang MLA, ki MDC bad ki nongkit kam jong ka balang bad ki reiw rangbah na ka liang jong ki shnong kila ia dong lang ha kane ka sngi.
Ia ka jingialang la pyniaid da u Rev SS Majaw,shongknor ka hospital, la ia ka jignduwai la leh da u Dr. Kenneth R L Nongpiur, la kren pdiang burom da u bah Herbert F Parait, la batai ia kane Nursing College da ka kong L Warbah Principal kane ka college, la kren ai khublei da u Dr. R. Nongum bad la duwai pynwai da u Rev S R Dkhar.
