Shillong, Nailar 27: Ka samla Angelia N Marweiñ kaba dang 24 snem ka rta kaba la pyndep ia ka Graduate ha ka Political Science na St Edmund, Shillong mynta ka kynti ka la shah jied ban leit mihkhmat ia ka jylla Meghalaya ha kane ka jingiakop jong ka Femina Miss India 2024. Kane ka jingiakop thei babriew ka ba 60, ia ka ba kin don ki nongïashim bynta na baroh 29 tylli ki jylla bad ki Union Territories.
Ha ka jingiakren bad ki nongthoh khubor mynta ka sngi ka 27 tarik u Nailar 2024 ka samla Angelia ka la pynpaw ba ka sngew sarong haduh katta katta ban mihkhmat ïa ka Jylla ba itynnad jong ka Meghalaya ha ka jingïakob Femina Miss India 2024 kaban sa long shen ha u bnai Naiweing 2024.
Ka la ong ruh ban Kane ka dei ka jingangnud kaba la wan urlong na ka bynta jong nga, bad ka long ka jingkyrkhu ban ioh ia ka lad ban pyni ym tang ia ka jingleit jingwan shimet jong nga, hynrei ruh ia ka kolshor bad ki riti dustur kaba riewspah jong ka jylla jong ngi ha kum kane ka rynsan kaba heh.
Ka samla Angelia ka dei kaba mih na ka imlang sahlang Khasi kaba don ki jaitbynriew, ka long ka nongïakhih kaba skhem bha na ka bynta ka hok jong ki kynthei bad ka jingïaryngkat shynrang bad kynthei.
Ki jingpule jong ka ki kynthup ïa ka jingthoh Masters halor ka “Maitshaphrang Movement,” kaba wad bniah ïa ka bynta jong ka ha ka jingïaryngkat shynrang bad kynthei hapoh ka imlang sahlang Khasi.
Haba kylli shaphang ka jingpynkhreh jong ka na ka bynta kane ka jingïakop, ka Angelia ka la ong, “Ka jinglong thymmai ha kane ka rynsan ka la pynshlur ïa nga ban trei shitom shuh shuh. Nga pynleit jingmut ha man la ka bynta jong ka jingpynkhreh—la ka long ka jingpynkhreh, ka jingkoit jingkhiah, ne ka jingsngewthuh ïa ka jingmut jong kaei kaba mut ban ka Miss India.”
Ki jingsngewtynnad bapher bapher jong ka Angielia, kynthup ia ka jingrwai, ka shad bad ka jingialehkai, ki iarap ia ka jinglong kaba jylliew bha jong ka. Ka la ju iashim bynta mynshwa ha ki jingialehkai madan bad ha ka lynti iaid kjat bad ha ka basketball ha ka kyrdan skul.
Bad haba ïadei bad ka kam model, ka Angelia ka la ïaid na ka bynta kiba bun ki jait jingrwai kiba heh bad kiba rit ha kylleng ka ri India kum ka Jade da ka Monica bad ka Karishma bad katto katne kiwei pat ki jingrwai ha ka Delhi Times Fashion Week.
Ha kaba ïadei bad ki jingangnud jong ka na ka bynta kane ka rynsan, ka Angelia ka la pynpaw, “Nga thmu ban pyndonkam ïa kane ka kabu ban wanrah ïa ki mat kiba kongsan, khamtam kito kiba ktah ïa ka imlang sahlang jong nga ha Meghalaya, kum ka pule puthi, ka jingpynkupbor ïa ki kynthei, bad ka jingpynneh pynsah ïa ka kolshor.”
Kum ka jingtip ba ka lahduh jong ka Femina Miss India 2024 kan mihkhmat ia ka Ri India ha kane ka jingiakop Miss World kaba 73. Ka Miss India kaba dang bat mynta, ka Nandini Gupta na Rajasthan kan sa pynkup pansngiat ia ka nongmih bujli jong ka ha ka ba kut kane ka jingiakop.
