Shillong, Lber 11: Hadien katto katne por ba ka seng Khasi Student Union ka la mih ban iakhih bad thmu ban leit tur kynsan ha Assembly katba ka dang iaid ka budget session ban pynpaw ka jingpyrshah jur halor ka Meghalaya State Investment Promotion bad Facilition Act (MSIPF) bad ia ka jingthmu ban wanrah lynti rel hapoh ka Jylla.
Hadien ba ki dkhot ka seng Khasi Student Union ki la mih na ka jingiakren u myntri rangbah u Conrad K Sangma ha ka jingiadonlang arngut ki symbud myntri rangbah u bah Prestone Tynsong bad u bah Sniawbhalang Dhar kumjuh ki heh ophisar ki la pynpaw ka jingbym hun ia ka jing jubab ka sorkar ha katei ka jingiakren.
Haba iakren bad ki lad pathai khubor u bah Lambokstarwell Marngar u la pynpaw ba ka seng kam sngewhun satia ia kane ka jingiakynduh namar ka khlem ai kano kano ka jingkular ba da ka jingthoh.
Ha kane ka jingiakren u Conrad K Sangma u la shu kular tang da ka ktien ba un sa bishar bniah ia kane ka aiñ bad ban wanrah ia ka jingpynkylla ha ka dorbar synrai mynta u snem da kaba ynsa shim lang ia ka jingpynsngew jong baroh ki ba donbynta bad kynthup ki kynhun seng bhalang.
U bah Lambokstarwell Marngar u la ong ba ka seng kam shaniah ia ka jingkular ka sorkar ba tang da ka ktin bad ka seng kan sa shong CEC meeting halor kane ka aiñ namar ba ka seng kam kwah ba ki aiñ ba ka sorkar ka wanrah kin long kum ki mawjynthut ia ki trai ri trai muluk.
