Shillong, Naitung 14: Mynta ka sngi u Superintendent ki pulit jong ka East Jaintia Hills District u Jagpal Singh Dhanoa u la pyntip ba ha ka por 1.40 baje mynstep mynta ka sngi kala don ka jingshah pynbethei bom ha ka jaka sah jong ki pulit ha Khliehriat jong ka East Jaintia Hills District.
Katkum ka kyrwoh kaba la pynmih na ka ophis jong u SP ka East Jaintia Hills District la iathuh ba kane ka jingpynbthei bom kala jia ha ka jaka shah jong ki pulit hapoh Police Reserved Khliehriat jong ka East Jaintia Hills District, na ka liang jong ki pulit kila ong ba kane kadei ka kam jong ki khawpud da kaba shim kabu ia ka jingdum bad ka jingjur jong u slap.
Na ka liang ka ophis jong u SP ka East Jiantia Hills la ong ba kat haduh ba phah ia kane ka kyrwoh, ki pulit kila ong ba ia kane ka kam pynbthei bom ha Police Reserved Khliehriat la kam da ka seng lehnoh ka Hynniewtrep National Liberation Council (HNLC).
Haba ia dei bad kane ka jingjia ki pulit kila register ia ka ejahar hapoh Khliehriat police station P/s case No. 48(07)2021 hapoh ka kyndon, 120B, 121, 121A IPC bad hapoh ka kyndon kaba 3 jong ka ain Explosive Substance Act bad ka kyndon 10/13 UAP Act, ka jingtohkit kala iaid sha khmat bad la kem u wei halor katei ka jingjia.
