Shillong, Nohprah 13: Ka Synjuk Ki Rangbah Kur ka Bri U Hynniewtrep (SRKBH) ka pynpaw ia ka jingsngewkhia ia ka jinglong jingman ka shong suk shongsain ha ka jylla kaba la ktah na kane ka jingiakhih ia ka CAB, na ka liang jong ka Synjuk kan nym pdiang ia ka CAB.
Kum ka kynhun ki rangbah kur ka pynpsngew ba lada don kano kano ka jingiakhih ruh kam dei ban kylla sha ka jingiaklumar namar kane ka ktah ia ka shong suk shong sain. Ha ka juh ka por ka Synjuk ka kyntu ia ki seng bhalang baroh ba kin wan ha kawei ka shatri ban ia pyrshah ia ka CAB katkum ki lynti.
Na ka liang jong ka synjuk ka pynkynmaw ba ha ka jingialeh ban ioh ia jylla la ialeh khlem da don kano kano ka jingiaumsna. Kumba ka paw ba ka jylla Manipur kala ioh ia ka ILP khlem poi pyrkhat kumta la kyntu ia ki samla ba kin shim ia ki lynti jingiakren ban dawa ia ka ILP.
Ha kane ka jingdawa ia ka ILP don kam ia ki riew shemphang katkum ki riti synshar jong ka Ri India ban ia kren. Namar katkum ka article 19 jong ka Riti synshar jong ka Ri ha ka bynta kaba san kala kren shai ba ka don ka lad jingiada ia ki rit paid khatam ia ki riewlum.
Na ka liang jong ka SRKBH ka don ka jingkyrmen ban ioh ia ka ILP da kaba iaid katkum ki riti synshar jong ka Ri India, lada ka jylla Manipur ka ioh kan iapher aiu ban ai ia ka jylla Meghalaya, kane ka long katkum ka kyrwoh kaba la phah da u Bah Herman Nongrum President bad u Bah Aristotle L Mawphlang General Secretary jong ka Synjuk.
