Shillong, Kyllalyngkot 17: Ka Sorkar Jylla ka dang ap iaka jubab naka tnat iada Ri ka Sorkar India ban ioh jaka ha Lum Survey kaba dei ruh ka jaka jong ki shipai ban pynkynriah iaki 342 tylli ki Longiing na Them Iew Mawlong.
Kane ka wan hadien ba ka Harijan Panchayat Committee (HPC) lyngba ka jingïarap ki Nongialam ba rangbah na ka jaidbynriew Sikhs kila thoh sha u Myntri ka tnat iada Ri ban pan jaka ha Lum Survey ban kynriah na Them Iew Mawlong.
Haba pynthikna ïa kane u Symbud Myntri Rangbah ka Jylla Meghalaya ba khmih iaka tnat kam Pohiing u Bah Prestone Tynsong u la pynksan ba ka jingioh ia ka jaka shipai ha Lum Survey kan dei ka lynti kaba paka eh ban pynbeit ia ka kam ba sahteng ban pynkynriah ia ki briew na Them Iew Mawlong.
U Bah Prestone u la ïathuh ba ka Sorkar Meghalaya ka la thoh ruh shaka Sorkar India ba lada long ban mynjur ha ka ban ai tang 2.5 lane 3 acre na ki jaka shipai kaba don mar pyrshah ka Petrol Pump ha Iew Mawlong ban kynriah iaki ba sah ha Them Iew Mawlong.
U Bah Prestone U la ong, lada ka Sorkar India ka lah ban leh ia kata, nga thikna ba yn ym shimpor, ngin sa lah ban pynbeit ia kane ka kam
U Bah Prestone u la kren shai ba lada ka Sorkar India lyngba ka tnat iada Ri kam ai jaka ha Lum Survey, ka Sorkar Jylla kan iaid beit katkum ka Blueprint (Plan) ban pynkynriah ia ki 342 tylli ki Longiing na Them Iew Mawlong.
