Shilong, Lber 03: U Myntri kam poh iing ka jylla u bah Prestone Tynsong haba jubab ia ka jingkylli u bah Nujorki Sungoh haba iadei bad ka Laskein Civil Sub-Division la ong ba ka sorkar ka dang bishar bniah halor katei ka jingdawa.
Haba jubab ia ka jingkylli bynrap, U Myntri kam poh iing u la iathuh ba ha u snem 2021 la bthah ia baroh ki tnad sorkar ba kin ai ia ki jingkhein, la ong ba haduh mynta dang don ki tnad sorkar ki bym pat ai ia ki jingkhein ne ki kaiphot.
La iathuh ba ka sorkar ka la buh ia ka kommittee ba la khlieh da u Chief Secretary ka jylla bad hadien ba la bishar bniah da ka kommittee yn sa phah sha ka sorkar ban peit bniah namar ba ban pynmih ia ka Civil Sub-Division donkam ban shna ia ki post ha ki kyrdan bapher bapher bad kunjuh ia ki iing ophis ban ong katno Kan lut yn nym lah ban ai jingkhein.
U bah Nujorki Sungoh MLA, la pynsngew hapoh ka iing dorbar ba ka Laskein Block ka dei kaba la shna ha u snem 1973 kila don ki nongshong shnong 1.25 lakh ngut, ki longing kila don haduh 15,000 tylli bad ka jingiar jong ka ka long 500 sq kilometre.
Haba iadei bad ki Civil Sub-Division kiba la dep ban plie ka sorkar kala shim ia ka rai ban shna noh ia ki ophis sorkar bad ban pynbiang ia ki jingdonkam ha ki Civil Sub-Division, haba iadei bad ka jingdawa ia ka Mawsynram Civil Sub-Division kam jingbishar bniah kan long da ka juh ka rukom.
