Shillong, Jymmang 22: Ka FKJGP Sengkmie hadien bala iohi lyngba ki lad pathai khubor haba iadei bad ka jing submit ia ka kaiphod kaba la mih lyngba ka inquiry commission bala khlieh da u Justice (retd) T Vaiphei, ha kaba iadei bad ka jing shah siat iap jong u nongialam barim ka HNLC U Bah Cheristerfield Thangkhiew, ia kaba la phah sha Myntri Rangbah ka jylla U Conrad Sangma ha ka sngi thohdieng.
Ka seng ka dap da ka jing lynga pisa ban tip ia kaei kaba don ha katei ka report namar kumba ka long mynta hi katei ka jing jia kaba la jia ha ka step jong ka 13th August 2021 ka dang buh hapdeng ka jingsahdum ym tang ia ka seng hynrei iaki paidbah nong shong shnong jong ka jylla hi baroh kawei.
Kum ban shu pynkynmaw ba hadien ka jing shah siat iap jong utei u nongialam barim ka HNLC U Bah Cheristerfield Thangkhiew ha ka step jong ka 13th August 2021 la mih shibun ki kynrum kynram kaba la wanrah ruh ia ka jingiakhih paidbah ha kylleng ki bynta jong ka rilum Khasi Jaintia ban dawa ia ka jingbishar kaba hok bad kaba laitluid.
Ka jing slem ban bishar bniah halor katei ka kam kala jan dap shisnem duna bad kala pynartatien ia uba bun u balang ba lehse ka lah ban don kaei re kaei sha lyndet.
Ka FKJGP Sengkmie ka pynpaw ba kumba ka long mynta ym don satia ba tip ia kaei kaba la thoh bad kdew shai ha katei ka kaiphod namar kat kum ka jing iohi lyngba ki lad pathai khubor ba ia katei ka kaiphod bala phah da u Justice (retd) T Vaipheila sealed bha ha kawei ka packet ha haba u Myntri Rangbah ka jylla U Conrad Sangma ula phah kylla pat sha ka Political Department ban pule bniah ia katei ka kaiphod.
Ka FKJGP lyngba kane ka kyrwoh ka kren da kaba shai kdar ba ka sorkar kam dei shuh ban dang pynslem ban sei madan ia ki jingshisha baroh bad ba ka sorkar kam dei shuh ban dang aidaw ba katei ka kaiphod ka long “highly confidential” hynrei dei ban pyntip paidbah haba shit haba shai khnang ba ki paidbah kin ym sah satia ha ka umdum.
Ka seng hi ka sngew ba kaei kaba la pun khyndai bnai naduh u Nailur 2021haduh Jymmang 2022 ka por kala ih mynta ban paw ki jingshisha. Lada ka sorkar kam nud ban pyni paidbah ia katei ka kaiphod kaba la sakhi da ki 12 ngut bad ha ka jing shong bishar kaba la palat 20 sien kynthih ka pynpaw shai ba ka sorkar jylla ka kwah ban buhrieh ia ki jingshisha.
Ka seng ka ong ba lada ka mih kano kano ka jingiakhih paidbah sa shisien pat kaba lah ban ktah ia ka jing shongsuk shong shngain ha ka jylla ka sorkar hi ka hap ban shim ia ka jingkitkhklieh, kane ka long katkum ka kyrwoh kaba la phah da u Dundee Cliff Khongsit, Working Presiden, FKJGP Central Body.
