Shillong, Kyllalyngkot 24: U Symbut myntri rangbah ka jylla u Bah Prestone Tynsong u la ong ba ka sorkar MDA kala buh teng shuwa ia ka skhim shna iing kaba la tip kum ka “Affordable Housing Scheme” kaba la wan rah da ka sorkar U Dr Mukul Sangma shuwa ka ilekshon.
Haba kren ha ki lat pathai khubor u symbut myntri rangbah u la ong ba ka jingbuh teng shuwa jong ka sorkar ia kane ka skhim shna iing kaba kyntup ia ka ram kaba ki paidbah ki dei ban shim ka long ba kam long kaba lah ban pyntrei kam. La ong ba bun ki paidbah ki tieng ban shimram.
Na ka liang jong u bah Prestone Tynsong u la kren shai ba ka sorkar kan dang iai beteng ia ka jingai jingiarap ia ki paidbah ban shna iing lyngba ki tin sop iing, ia kane ka sorkar kan dang iai beteng na ka bynta ka jingmyntoi jong ki paidbah.
U symbut myntri rangbah u la ong ba ia ka skhim shna iing kaba la tip kum ka “Affordable Housing Scheme” la pyntrei kam tang hapoh Ampati bad kiba ioh ia kane ka jingmyntoi ruh ka long tang kumba 100 tylli ki long iing.
