Shillong, Lber 12: Ka myntri ba dei peit ia ka tnad ka koit ka khiah ka Dr. M. Ampareen Lyngdoh haba jubab ia ka jingkylli jong u Dr. Mukul Sangma halor ka Tura Government Medical College, la ong ba ka jingtrei kala dep 75% haduh mynta.
Ka myntri kala ong ba kane jingeh kane ka jaka ka dei 99 akar, ka sorkar pdeng kala mang pisa ka long T.170.10 klur tyngka bad ka pisa kaba la ai sha ka PMC haduh mynta kala kot sha ka T.185.65 klur tyngka, ka jingsiew sha kontraktor ba pyntrei haduh mynta la siew T.178.66 klur.
Haba jubab ia ki jingkylli bynta kala ong ba kane ka jaka pule Doktor kan lah ban pdiang ia ki samla pule MBBS haduh 100 ngut bad katkum ki kyndon don kam ban don jingthiah ha ki Hospital 420 tylli, bad ka sorkar ka dang ialeh ban pynbun ia ki jingthiah haki ar tylli ki hospital sorkar ha Tura.
Ka Tura Civil Hospital ka dong tang 200 jingthiah ka sorkar mynta ka dang ialeh ban pynbun ia ki jingthiah ha kane ka hospital sa 80 tylli ki jingthiah bad ha Tura Maternity Hospital ka don tang 50 tylli bad mynta ki hap ban pynbun sa 70 tylli ban kot sha ka 420 tylli ki jingthiah ha kitei ki ar tylli ki hospital.
Ka myntri kala jubab da kaba shah kdar ba ka sorkar kan shim ia baroh ki lat ki lynti ban pynthikna ba kane ka Tura Government Medical Collage kan ioh ban sdang noh kloi, ka sorkar kala shim ia baroh ki lat ki lynti ban peit ba kane ka jaka pule doktor kan ioh sdang noh ban ai jinghikai.
