Shillong, Naitung 09: U myntri ka sorkar jylla u bah Comingone Ymbon ba dei peit ia ki Um kiwah u la leit ban jurip ia ki jaka kiba la shah ktah ha ka jingshlei um ha South West Garo Hills District mynta ka sngi.
Ha kane ka jingleit na ka liang jong u myntri u la ong ba ka sorkar ka wat ki lat ki lynti kumno ban leh haba wan ki jinglynshop ka mariang, ha kaba ka sorkar ka ialeh ban pynneh pynsah bad ban shna ia ki jingtrei kiba don kam ha katei ka thain.
Ha kane ka jingleit, u myntri u la khot ia ka jingialang ban ia kren ha kaba ia dei bad ki skhim kiba ia dei bad ki jingiada na ki jingshlei um, ha kane jingialang la ia kren ia ka jaka ring um sha ki jaka rep kaba la tip kum ka Daru Flow Irrigation Project (FIP) ha Anangpara, Rongkai FIP ha Kalaipara.
Ha kane ka jingiakynduh la ia kren ruh ia ka jingshah khlong ka khyndew ha ka wah ha ka shnong Purakhasia kaba ka wah Darong ka tuid, ka Bandoraja FIP, ha kaba u myntri u la hukum ban bteng ia ka jingtrei ha kane ka wah da ka ba bei pisa na ka bhah jong ka jylla bad ban weng ia kane ka jingeh don kam ban shna bha na ka skhim jong ka sorkar pdeng.
Haba ia dei bad ka jingduna ki nongtrei ha ka ophis jong ka tnad sorkar pynneh ia ki Um kiwah la bthah ia ki ophisar ba kin phah ia ka jingpan briew shuh ban thung kam ia ki briew hapoh katei ka ophis bad la ong ba don kam ban ai ka jinghikai kumno ban pynneh pynsah ia ki tyllong um bad ban pyntrei bha ia ki skhim.
Ha ka jingleit la synranlang da u MLA jong ka Salmanpara, Ian Botham Sangma, u MLA ka Rangsakona, Subir Marak, u DC ka SWGH District u Hema Nayak, u Superintendent ki Police ka South West Garo Hills, u Vikash Kumar, ha kane la don lang ruh kiwei ki ophisar sorkar.
