Shillong, Risaw 7: Ka tnad pule puthi jong ka sorkar jylla kala trei shitom ban pynioh ia ki jaka ban tei ia ki skul kiba la tip kum ka “Eklavya Model Residential School” kaba ka jylla Meghalaya kala ioh haduh 25 tylli kum kine ki skul.
U Myntri ba dei peit ia ka tnad pule puthi u Bah Lahkmen Rymbiu haba kren ha u SP News Agency u la iathuh ba ka sorkar kala lah ban pynioh ia ki jaka ban tei ia kine ki skul ha ka jylla wat la ym pat lah ban ioh baroh hynrei la jan baroh la dep ban ioh ia ka jaka.
Kine ki skul ki dei kiba la mang na ka sorkar pdeng lyngba ka Ministry Tribal Affair bad ka jingthmu jong kine ki skul ka long ban iarap ban kyntiew ia ki riewlum ha ka liang jong ka pule puthi ha kylleng jong ka Ri India.
Ki jylla ha ka Ri India kiba la ioh ia kine ki skul ki long 23 tylli bad ka jylla Meghalaya ka dei kawei na ki jylla kaba la ioh ia kine ki skul na ka sorkar pdeng. Kine ki skul kiba yn sa tei ka jylla Meghalaya kin long ha kylleng jong ka jylla.
