Shillong, Lber 06: U myntri rangbah ka jylla u Conrad K Sangma ha ba wanrah ia ka mang tyngka jong u snem 2025-2026 ha ka 5/3/2025 hapoh ka iing dorbar la kdew ba yn shna ia ka surok na Dalu ha West Garo Hills sha Sonapur jong ka East Jiantia Hills District ka jingjrong ka surok ka long 450 km.
La buh ia kane ka jingtyrwa ba kane ka surok kan long ban kyntiew ia ka ioh ka kot bad ia kane la dep ban buh ia ki jingthoh ka tnad DoNER bad ka tnad shna surok ka sorkar pdeng, kane ka surok kan iaid lyngba ki 9 tylli ki kad khaii bad kawei ka border hat ha Balat.
Ha kane ka shilynter ka surok ki don haduh 25 tylli ki jingkieng bad kiba la sniew palat bad don kam ban shna pynbha ia ki bad kane kala buh ia ka jingeh ban iaid ki kali kiba kot bun bun tone bad kum juh ki kali kit nongleit nongwan.
Ka sorkar kan sa sdang ban shna kato katne tylli ki jingkieng ha kane ka snem mang tyngka ban wan bad kane kam dei tang ban shna ia ka surok hynrei yn pynbha ruh ia ki kad khaii sha Bangladesh bad ia ki border Hat kum juh.
