Shillong, Iaiong 09: Ka jingtrei shitom ka tnad rep soh ha ka jylla Meghalaya kala pynlong ia ka jylla ba kan dei kawei na ki jylla ha Ri India ban pynmih ia u soh Strawberry mynta la bun bun snem na ka jaka rep jong ka sorkar kaba don ha Dewlieh ha Ri Bhoi District.
Kane ka kam rep soh Strawberry ha ka jylla mynta kala dang heh bad haduh mynta ka jingrep ia u ne u soh kala long haduh 132 hectares ha kane ka jylla, hynrei kaba phylla ka long ba ia u symbai dang wan rah na Pune bad die sha ki nongrep kane ka jylla ha ka dor kaba T.15 tyngka shi tynrai.
Katkum ki jingia kren u SP News Agency bad ki nongrep soh Strawberry kila iathuh ba mynshuwa u symbai ba ki ioh dei bala wanrah na California na America bad ha dien katta la pynmih noh na Pune ha India bad u symbai u la ia pher.
Na ka liang jong ka tnad repsoh ka jylla kala pyrshang ban pynmih na kane ka jylla ia u symbai hynrei haduh mynta la katto kattne snem ka jingpyrshang ym pat lah ban pynmih ia u symbai soh Strawberry na ka jylla.
