New Delhi, Naiwieng 27: Ka Tnat Road Transport and Highways jong ka sorkar pdeng lyngba ka S.O. 4252 (E) kaba ha ka 26 tarik Naiwieng 2020 ka la pynmih ia ka ‘Helmet for riders of Two Wheelers Motor Vehicles (Quality Control ) Order, 2020.’ La kynthup ia ka ‘Protective Helmets for Two Wheeler Riders’ hapoh ka BIS certification kaba long kongsan bad ka jingpynmih ia ka Quality Control Order.
Katkum ki jingbthah jong ka Supreme Court Committee halor ka Road Safety ban pyrkhat ia ki helmet kiba kham sting ha India kiba iahap bad ka jinglong ka suin bneng ha ka ri bad ban pynthikna ka jingmynjur hapdeng ki nongshong shnong ban deng ia ki helmet, la wanrah ia kane ka Committee.
Kane ka Committee ka kynthup ia ki riewshemphang na ki bynta bapher bapher, kynthup ki doctor ba pawkhmat jong ka AIIMS bad kumjuh ruh na ka BIS. Hadien ka jingpeit bniah, ka Committee ha u bnai Lber 2018 ha ka kaiphod jong ka, ka la ai jingmut ban pyndonkam ia ki helmet ba kham sting ha ka ri, bad ka Tnat ka la pdiang ia kane ka kaiphod.
Katkum ki jingai jingmut jong ka Committee, ka BIS ka la peit bniah ia ki kyndon ha kaba la khmih lynti ban pynlong ia ki helmet kiba kham sting. Namar ka jingiaid bha ha ki iew ha ka ri bad namar ka jingbun ki nongshna helmet ha ka ri, mynta la khmih lynti ba ka jingiakhun kan pynlah ban don ka jingdawa ia ki helmet kiba bha bad kiba kham sting. Ka jingdon ki kali ar shaka ba la shna ha India ha ka shi snem kalong 1.7 klur.
Ka QCO kamut ba yn pynmih tang ia ki helmet jong ki kali ar shaka ba la ithuh da ka BIS bad yn die ha ka ri na ka bynta ki kali ar shaka. Kane kan iarap ban lait na ka jingdie ia ki helmet jong ki kali ar shaka ki bym bha ha ka ri ka ban iarap ban iada ia ki nongshong shnong ba niah kali arshaka na ki jingmynsaw jur ha ki jingjia aksiden.
