Shillong, Jymmang 14: Ka seng United Democratic Party kan sa shim ia ka rai la kan ia shim bynta ne em ha ka All Party Committee ba la thaw da ka sorkar ban iathir iatai haba iadei ka mat lynti rel.
Ia kane la pyntip da u nongialam ka seng United Democratic Party u bah Titostarwell Chyne ha ka jingiakynduh bad ki nongthoh khubor.
U bah Titostarwell Chyne u la ong ka seng United Democratic Party haduh mynta ka pyrshah ia ka lynti rel, namar ba ym pat don ka aiñ ka ban iada ia na ka jingwan rung laitlan ki briew ba nabar ka jylla.
U la ong ba ka party kan sa shong jingialang ha kine ki sngi ban pyrkhat bniah la kan iadon bynta ne em ha ka All Party Committee ba la khot da ka sorkar halor ka lynti rel.
U haba ia dei ka jingkynoh ka HNLC ba u symbud myntri rangbah ka sorkar jylla u bah Sniawbhalang Dhar u donkti ban bei tyngka ia ka, u bah Titostarwell u la ong, ba kano kano ka jingkynoh ka dei ban long ha ryngkat ki sakhi satar ba thikna, ym ban shu kynnoh kulmar iano iano.
U la ong ba ban pynlong ka jingtohkit kan shong ha ka sorkar, hynrei ha u, u sngew ba kane ka jingdawa ki katto katne ki seng saiñ pyrthei ban pynlong jingtohkit ka long ba bym don jingmut bad bym shong dor haei haei ruh.
