Shillong, Rymphang 20: Halor ka jingpynbethei bom ha ki karkhana shet Koke ha thain Riangdo mynta ka sngi, ha ka kyrwoh kaba la phah da u general secretary ka seng lehnoh u Bah Sainkupar Nongtraw u la kam ba ia kane ka kam la leh da ka seng HNLC. Ka jingnpynbethei bom ka long ha Kyllon Mathei Pyndeng Jalong jong ka West Khasi Hills District.
U tei u nongialam ka seng lehnoh, u la kynnoh ba ki kharhana shet Koke ha katei ka thain baroh ki dei kiba trei benami bad la kynnoh ba kine ki karkhna kila mih shibun ryngkat ka jingiatrei lang bad ki briew kiba don ha ka sain pyrthei kumjuh ki nongkhaii.
Na ka liang jong ka seng lehnoh HNLC ka long kaei kaei kaba ym lah ban sngewthuh ba ki nongtrei ha kine ki karkhana Koke dei kiba na bar bad ki trai jylla kim don, ka jaka kum ka Riangdo bad Shallang ka dei ka jaka ba mih dewiong hynrei kam shym don kano kano ka kam pynroi sha katei ka thain kam ka tei ka seng lehnoh.
Katei ka seng lehnoh kala kdew kti bad ka jingsniew jong ki surok ka long kaba la palat, la ka long ha Jaintia Hills ruh kum juh. La kynnoh ba wat la ka jingtih dewiong kala long da ki phew snem hynrei ka jaka ka dang sahdien kiba myntoi dei tang ki heh spah, kitei ki jaka kim don wat tang ia ka hospital kaba biang kynnoh ka HNLC.
U general secretary jong ka seng HNLC u la kynnoh ba ka ioh ka kot jong ka jylla kala dang hiar naduh ki por jong ka sorkar congress bad kum juh kane ka sorkar MDA kaba mynta kam shym don kano kano ka jingkylla la kynnoh u general secretary ka seng HNLC.
U General secretary ka seng HNLC u la ong ba ka jingpynbethei ha Riangdo ka long tang ka jingsdang, ha ka juh ka por la ong ba ki nongialam seng sain pyrthei ki nongkhaii ba kin kiar na ki kam beain, ong u bah Sainkupar Nongtraw General secretary bad Publicity secretary, ha ka kyrwoh kaba la phah mynta ka sngi.
