Shillong, Nohprah 11: U bah Sanbor Shullai MLA jong ka 19-Shillong South mynta ka sngi u la u la plie ia ar tylli ki surok ha ka shnong Lower Lumparing, kaba ka jinglut ia kine ka surok ki long palat T.2 klur ba la mang na ka PWD , kawei ka surok ka dei kaba don ha ka Dong Ranab kaba jrong kumba 180 meter bad kawei pat ka dei ka surok naduh Dong Skul sha Dong Siej kaba jrong kumba 400 meter kaba ka jinglut ka la kot sha ka T.1.7 klur.
Ha ka jingplie ia kine ki ar tylli ki surok la don lang u EE jong ka tnad PWD ,ki nongialam shnong ba kynthup ia u Rangbah Shnong ka Lumparing, ki rangbah dong ki longkmie bad ki samla.
Haba kren ha ka jingialang u Bah Sanbor u la pynpaw ka jingsngewnguh ia u Myntri Rangbah barim bad u Myntri Rangbah ba mynta, u Dr Mukul Sangma bad u Conrad Sangma kiba la shim khia ban pyllait ia ka scheme na ka bynta ki nongshong shnong ha Lumparing.
Ha kane ka jingialang u Bah Sanbor u la ong ba hap ban treishitom na ka bynta ban pyndap ia ki jingdonkam, watla kam long kaba suk ban pynioh ia ki scheme na ki tnat Sorkar.
U la ong ba ki don kiba pyrshah ia u ba ka surok ba u plie kaba dei ka pisa paidbah u ai ha ka kyrteng lajong, hynrei u Bah Sanbor u la buh jingkylli kylla ia kiba ialeh pyrshah balei khlem ioh ia ka surok haba ki nongialam shnong ki la dawa la 45 snem, balei u Bah Sanbor pat u lah ban pynioh.
La ong ba ka jingai kyrteng ia ka Surok kam dei ka jingkwah ka jongu, hynrei ka dei ka rai ba la shim da ki nongpyniaid shnong lada u lah ban pynioh. U Bah Sanbor u la ong, to ai ba kito kiba kren bein kren khoh kin ia kit da u bsein shi khoh.
Ha kawei ka liang u MLA u la pan ruh ia ki kyrteng jong baroh ki trai jaka ba la ai kylluid mynsiem ia ka jaka na ka bynta ka jingmyntoi lang ki paidbah nongshong shnong, ha kaba u la ong ba watla ka Sorkar kam lah ban ai ia ka bai lutksan ia ka jaka.
Ha kane ka jingialang plie ia kitei ki ar tylli ki surok la ong ba kum u nongmihkhmat u la pynbna ban ai burom ia kito baroh ki trai jaka kiba don bynta ban synniang ban pynioh ia ka surok bad kumjuh ruh ia kito kiba la ai jaka naduh ka Ri raid Laban bad kiwei.
