Shillong, Naitung 20: U Myntri rangbah ka jylla Meghalaya u Conrad K Sangma u la iathuh ba mynta ka sngi kala don ka jingiakynduh bad u Chairman jong ka Coal India Limited ha Kolkatta ban ia kren kumno ban kit ia u dewiong ba dang sah katkum ka rai jong ka iing bishar kaba ha khleih duh jong ka Ri India.
Haba kren ha ki lad pathi khubor mynta ka sngi mar ia poi ha kad liengsuin ha Umroi, u la iathuh ba ha kane ka jingiakren kila ia poi sha ka jingiasngewthuh jingmut kumno ban kit ia u dewiong ba dang sah 32 lak metrik tone u dewiong ha kane ka jylla.
Namar ba ka Coal India Limited kam don ophis trei kam kaba biang ha kane ka jylla Meghalaya kila iarai ban don ka jingiatreilang bad ka sorkar jylla kumno ban leh ia kane ha kaba kin dang ia beteng ia ka jingiakren halor kane ka kam.
Ki jingiakren kiba dang hap ban ia pynbeit ka long ban leit jurip ia u dewiong ba dang sah ha ki jaka bad ha dien kata kin sa ia pynbeit ha kano ka rukom ban leh da ka jingiatreilang ha pdeng ka CIL bad ka sorkar jylla, la ong u Conrad.