Shillong, Jylliew 12: Ka kynhun tohkit jong ka sorkar pdeng ka Central Bureau of Investigation (CBI), Guwahati kala kem ia u Professor jong ka shnat pule “Zoology and Dean of School of Life Sciences”, ka North Eastern Hill University, Shillong u wei u riew shimet ba dei trai jong kawei ka kompnei na Guwahati Assam katba u dang shim ia ka pisa T. 3.43 Lak tyngka ha Guwahati University Guest House, Guwahati.
Ia ka ejahar la register da ka CBI haka 11/06/2025 ia baroh kitei ki ar ngut ki briew kata u Professor ka NEHU bad ia u riew shimet halor kine kiba la shah kynnoh bam sap, la suba ba u professor u la don ka jingioh na kane ka jingsupply tiar ha kaba ia dei bad ki tiar kiba ia dei bad ka jingpule kiba pyndon kam ha ka shnat pule science bad la kynnoh ba kane ka jingai pisa ka long ban pynlait ia ki bills.
Ka CBI ha ka kyrwoh kala kam ba kala ioh ban kem ia kine ki briew ha ka por ba ki dang ia ai bad ia shim ia ka pisa ia ki la rah sha iing bishar mynta ka sngi ka 12.06.2025 ha Guwahati bad ka jingkhynra ia ki jaka sah jong kitei ki dang iaid ban lap ia ki kot ki sla kiba ia dei bad kane ha bun ki jaka bad ka jingtohkit kan dang bteng.
Ha ka FIR la kdew ia ka kyrteng u Nirmalendu Saha, Professor ka “Zoology and Dean of School of Life Sciences”, ka North Eastern Hill University, Shillong, Meghalaya bad ia u riew shimet la ithuh kum u Pranjal Sharma ba shong bas ha ha Bishnu Rabha Path, Beltola, Guwahati, Assam.
