Shillong, Rymphang 14: Ki shipai iada khappud ki Border Security Force, Meghalaya kila ioh ban kem ia 14 ngut ki nong Bangladesh bad ia 3 ngut ki nong India katba ki dang pyrshang ban kam sha shilliang pud lyngba ka khappud ha border.
Kane kala wan hadien ba ki BSF kila ioh ia ka jingtip ba tikna halor ka jingdon jong kine ki briew, ki shipai BSF ki la bat ia 8 ngut ki nong Bangladesh ryngkat bad uwei u nong India (u nongniah) uba niah da ka kali Innova sha Tura lyngba ka NH-217. La kem ia kitei ki arngut hajan u pud u sam jong ka khappud, ha ka por ba ki dang pyrshang ban rung sha Bangladesh na India.
Ha kawei pat ka jingkhynra ki shipai BSF Meghalaya ki la ioh ban kem sa 6 ngut ki nong Bangladesh ryngkat bad arngut ki nong India hajan khappud. Ïa kine ki jingkhynra la pynlong kum shi bynta jong ki shipai BSF Meghalaya kiba dang ïaid shakhmat ban khanglad ïa ka jingwan rung kyrthep beaiñ bad kiwei kiwei ki kam sniew sha shiliang pud.
Ki shipai BSF kiba peitngor bha na Tura bad ka 4th Battalion ki la lap ïa ki jingïaid lynti kiba suba ha khappud bad ki la shim khia mardor, bad kem ïa baroh 14 ngut ki nong Bangladesh bad lai ngut ki nong India.
Hadien ba la kem ia ki, ki BSF ki la aiti noh ïa ki briew sha ki Pulit ba dei peit na ka bynta ban pynngat ha ki kyndon aiñ. Hadien ba la tohkit, kitei ki nong Bangladesh, ki la phla, ba ki dei kiba trei kum ki nongthain jain bad ki nongbylla ha ki kompeni thain jain ha Tiruppur, Tamil Nadu, bad ki la wan rung be-ain sha India, ha ki katto katne bnai mynshwa.
