Shillong, Nailur 01: Ban kynmaw burom ia ka jingdap 75th snem ka jinglaitluid jong ka Ri India, ka kynhun shipai BSF kala pynlong shibun ki jingialeh kmem, ka kynhun tem na ka kynhun shipai BSF kala pynglong ia ka jingtem ha kiba bun ki jaka ha kane ka jylla Meghalaya.
Nalor katei, la pynlong ruh ia ka jingialehkai kawang ball ha pdeng ki shipai BSF bad ki BGB, ka jingialehkai kynjat ball, ka jingpyniaid kynhun ia ki bike ha ka sngi rakhe ia ka sngi burom ki nonghikai bad kila don ruh ki jingpyninam ia ki rain tynrai kaba la sdang naduh u Naitung bad kin pynkut ha u bnai Nohprah 2022.
Kum shibynta jong kane ka jingleh kmen ia ka jingdap 75th snem ka jinglaitluid ka Ri India, mynta ka sngi la khaweh lama ban pyniaid paidbah ia ka kynhun ki bike na ktem ki shipai BSF kaba don ha Mawpat, Shillong 01/Nailur/ 2022 bad kane ka jingiaid kynhun ki bike kin pynkut ha Delhi ha ka 16th Nailur 2022.
Kane ka kynhun kan iaid lyngba ki hynniew tylli ki jylla, ka jylla Meghalaya, Assam, West Bengal, Bihar Jharkhand, Utter Pradesh bad kin sa poi sha Delhi, kane ka kynhun ki bike kan iaid lyngba ruh shibun ki nongbah kum ka sor Shillong, Shillong, Guwahati, Dhubri, Siliguri, Maldah, Krishanagar, Kolkata, Durgapur, Hazaribagh, Varanasi, Prayagraj, Kanpur, Agra, Delhi.
Kane ka kynhun nongniah bike ki don 30 ngut, kata, na ka kynhun BSF Janbaz ki don 15 ngut kiba dei ki shynrang bad na ka kynhun BSF Seema Bhavni kiba dei ki kynthei ki don 15 ngut, ryngkat ba kine kin don ruh ki ban ia shim bynta ha kane ka jingia nih bike kiba dei na kito ki jaka.
Ia kane ka jingiaid kynhun ki bike la khaweh lama da u Dr. Lajja Ram Bishnoi, IPS, Director General ki pulit ka jylla Meghalaya na ktem shipai ki BSF kaba don ha Mawpat Shillong mynta ka sngi ka 1st Nailur 2022, ha ka jingiadon lang u Inderjit Singh Rana, Inspector General jong ki shipai BSF ba dei jong ka Meghalaya ha ka jingiadon ki heh sorkar na ki tnad bapher bapher.
Ha kane ka sngi la pynshong shit ia kiba don ban ia don bynta lang ha kane ka jingkhaweh lama da ka jingtem na ki kynhun tem ki BSF bad la bteng sa ka jingpyninam ia ki riam tynrai ia kaba la pyni da ki samla pule ki skul BSF, ia kane ka kynhun la pdiang burom ha Nongpoh Ri Bhoi District da u Deputy Commissioner bad kiwei ki heh sorkar bad na ka kynhun shipai BSF kiba dei na ka Commandant 172 Bn BSF.
Ha Nongpoh la pyni paidbah ruh ia ka phlim ha kaba ia dei bad ki shipai BSF, la pyni ruh ia ka jingleh Yoga bad la pyninam ruh ia ki tiar sait, ha kane ka sngi ha Nongpoh la pyni paidbah ruh ia ki jingthoh kiba dei pyrshah ia ki jingdih drok, ka jingiakhun pyrshah ia ki kam khaii beain ha khappud bad ka rukom ban ioh rung kam kam ha ka kynhun shipai BSF.
Kane ka jingiaid kynhun jong ki bike bad kiwei kiwei ki jingleh burom ka long ban pynsngewthuh ia ka jingsniew kaba mih na ki drok, ka jingkhaii beain ha khappud bad ha ka juh ka por ban khring ia ki samla khamtam na khappud ba kin rung sha kane ka kam shipai BSF kiba long ka kynhun kaba nyngkong ha ka jingiada ia ka Ri India.
Ha ka jingiakren bad ki khynnah skul bad ki samla ha ki lynti ba dei iaid kane ka kynhun bike, ka long ban pynsngewthuh ia ka bynta kaba ki shipai Border Security Force kum ka kynhun iada ri kaba heh tam ha ka pyrthei.
Ha ka jingkren u Dr. Lajja Ram Bishnoi, DGP ki pulit jong ka jylla Meghalaya ha ka jingkren lyngkot ha ka jingialang ha Mawpat shuwa ban khaweh lama la ong ba kane ka jingpynlong ia kane ka jingiaid kynhun kine ki paid ka long kum shibynta jong ka ‘Azadi ka Amrit Mohatsav’ kaba dei ka jingleh jong ka sorkar pdeng ban rakhe ia ka jingdap 75 snem ka jignlaitluid ka Ri India, kane ka dei ka khana pateng kaba dei ka jingjop ka Ri.
U DGP ki pulit ka jylla Meghalaya u la ban jur ban pynsaphriang ia ka khubor ban wanrah ia ka jingiatylli kawei ha ka Ri bad ban pynrung ia ka mynsiem ieit ri ha pdeng ki paidbah nongshong shnong bad kane kan rah ruh ia ka burom jong ki khun samla bad ban pynshlur ba kin rung ha kane ka kynhun shipai BSF bad kiwei ki kynhun shipai ban iada ia ka Ri.
