Shillong, Jymmang 09: U Myntri rangbah ka jylla u Cornad K Sangma mynta ka sngi la khaweh ia ka lama kum ka dak bala kit ia u synsar na Khlieh Umstem Ri Bhoi District 1,700 metrik tone ban leit buh sha ka Central Warehousing Corporation ha Guwahati ban die sha kiba thied kham heh dor.
La leh ia kane lyngba ka skhim CM-ASSURE, namar ka sorkar ka kwah ban kyrshan ia ki nongrep ha kapor ba hiar dor ki mar rep, kane ka skhim ka long tang na ka bynta kito ki mar ki bym pyut kiba lah ban neh slem.
Ha kane ka sngi u myntri rangbah u la sam ruh ia ki kali Pick-up sha kito ki nongioh ia ka skhim CM-Elevate, u myntri rangbah la ong ba ka sorkar ka kwah ban kyntiew ia ka rep ka riang bad ka jingkiew ka ioh ka kot ki nongrep.
Ka sorkar ka kwah ban iohi ba ia ki mar rep dei ban pynbha bad ban ioh ia ka dor kaba khambiang, ka jingeh kaba ka jylla ka iakynduh ka long ba ka jingpynmih bun palat kane ka ktah ia ka iew hynrei ka sorkar trei shitom ban weng ia kine ki jingeh.
Ka sorkar ka kwah ban kyntiew ia ka ioh ka kot jong ki nongkyndong da kaba kyntiew ia ka ioh ka kot, ka CM-ASSURE ka long ban klyrshan ia ki nongrep haba hiar ka dor jong ki marrep.
Katba ka CM-Elevate ka long ba kyntiew ia ki nongrep sha ki nongkyndong da kaba pynshlur ia ka rep kaba khlem pyndon kam dawai bad kumno ban die ia ki marrep kiba la dep ban pynbha ban ioh ka dor kaba kham rem.
