Shillong, Jylliew 01: ka Kong Harlismon Tariang kumba 85 snem karta ka kurim jong u Bah S. D. Khongwir bad ka kmie jong ka Dr. Alva Tariang, Raymond Tariang bam kwai ha dwar u blei ka Weishavina bad Arshavina Tariang kala khlad noh mynta ka step ka 1 Tarik Jylliew 2021 ha iing sah jong ha Mawlai Nonglum. Ka la ieh noh shadien ia la U Kurim, 3 ngut ki khun kynthei bad 14 ngut ki khunsiew shynrang bad kynthei.
Ka jingleit on tep ia kaba sah ka met jong i kan long ha ka 2 tarik Jylliew 2021 ha ka por 1 baje na iing sah jong i sha U Lum Jingtep Ka Balang Presbyterian Mawlai ha Mawlai Nonglum.
La ju tip ia i kum I Miss HK naduh u snem 1958, Head Of Department Political Science bad i lah shong thait kum ka Vice Principal na Lady Keane College Shillong hadien ba i la hikai kumba 38 snem. I dei iwei na ki lai ngut ki kynthei jong ka phang shatei lam mihngi ban pass ha ka MA political Science ha U snem 1958. I la hikai ruh shipor ha St. Mary’s College Shillong ha u snem 1958 hi.
I la dei ruh ka President Seng Kynthei Mawlai Pyllun bad Seng Kynthei Mawlai Nonglum la bun ki snem. Ka Seng Kynthei Mawlai Pyllun hapoh ka jingialam jong i ka la ioh khusnam na Ka Sorkar Pdeng halor ka jinglah jong ka SKMP ban buddien da kumno ba ki Nongbam ration kin ioh shisha ki marbam kiba bha bad biang bam bam. Da kane ka Khusnam Pisa ba ioh na Ka Sorkar Pdeng, Ka SKMP ka la ai khusnam pat kylla man la u snem sha kito kiba pass bha na Mawlai bad ioh kyrdan 1st – 10th ha ka jingialeh Examination Class X.
I Kong Harlismon Tariang i dei Founder Member jong ka Indian Council Social Welfare Meghalaya Chapter ha u snem 1972 hadien ba ka Meghalaya ka la ioh la ka jong ka jylla ba pura. kum Ka Founding Member i lah ioh ban leit mih khmat na ka bynta ka Ri sha arsien kawei ha Brighton (UK) bad Thailand, Bangkok.
