Shillong, Naiwieng 24: U Commandant bala shong thiat jong ki shipai Border Security Force (BSF) u B S Tyagi u ba la iada ia ka Killapara kaba don mynta ha West garo Hills na ka jingshah knieh ha ki shipai ka Pakistan ha ka thma 1971 u ka khlad noh na kane ka sla pyrthei ha ka 18.11.2019 mynta u bnai.
Katkum ka kyrwoh kaba la phah na ka kynhun shipai BSF la ong u Commandant Tyagi u la kyllon katba dang kilam met ha ka step jong ka 18.11.2019 ha ka por hynriew baje mynstep.
Ki shipai BSF ki iathuh ba u Commandant Tyagi u dei u la khatduh duh ban khlad uba la lait im ha ka thma 1971 ha ka jingiakhun ha Killapara bad ki shipai jong ka Pakistan ha khappud ha katei ka por, bun kila aiti iala ka jingim ban iada na ka jingwan tur ki shipai Pakistan.
Ki paidbah jong ka shnong Dalu haduh kine ki sngi ki dang iathuh khana halor kane ka jingjia ha kaba u commandant BS Tyagi bad ka kynhun jong u khlem jingriej kila ia khun pyrshah ia ki shipai jong ka Pakistan ban iada ia ka Killapara na ka jingshah knieh ha ka Pakistan.
Haka por ba ki shipai ka Pakistan kila wan tur ar sien sha Killapara ka kynhun shipai BSF hapoh ka jingialam jong u Commandant Tyagi kila iakhun dohiap haduh ban da lut lut ki kuli ha ka jingiasiat.
Ha ka step jong ka 25 tarik Jymmang 1971 ki shipai jong ka Pakistan kila niom da ka bor hynrei u Commandant Tyagi bad katto kattne ngut ki briew jong u ki khlem kynran dien.
Ha kane ka jingiakhun ki shipai BSF kila bun kila aiti iala ka jingim ban ia da ia ka Ri, kiba ia khun ia ka thma ki san sa tang 9 ngut hynrei ka jingshlur jong ki ban ia khun ia ki shipai Pakistan haduh ban da lut ki kuli kala pynlong ia ki shipai Pakistan ban kyndien.
Ka jingthmu jong ki shipai Pakistan ban ioh knieh ia kane ka surok Dalu sha Tura kaba dei ka surok kaba don kam tam kim shym la lah satia ban knieh. Namar ba kim don kuli shuh ban ia khun pyrshah ki shipai BSF kila pyndon kam da ki wait kiba don ha ki suloi riffle jong ki.
Ha dien ba Ri Bangladesh kala ioh ia ka jinglaitluid, ka kynhun shipai Bangladesh Border Guard kala pynkup burom ia une u shipai ba shlur. Ha ka por ba ki kam lehnoh kila khirasong ha Punjab la phah ia u sha Punjab ban ia khun bad hangne ruh u la pyni ia ka jingshlu ka jong u ban tem ia ki lehnoh.
Ha dien katta la phah ia u sha Jammu bad Kashmir ha ka por ba ki kam lehnoh kila sdang kiew rasong hapoh katei ka jylla mynshuwa, u la don kum ha Baramula, Kupwara bad Sopore. Ka jingnoh syniang ka jong u ka long kaba ka ri kan nym lah shuh ban klet. Ha ka por ba don ha Kashmir u la shah siat bad mynsaw ar sien.
U DIG ba mynta jong ki shipai BSF u U K Nayal ula ia trei lang bad u Commandant Taygi ha ka por ba u dang shah thung kam nyngkong ha Punjab bad Kashmir. U Commandant Taygi u la shah pynkup burom ruh ha u President ka Ri India da ka President Police Medal namar ki kam shlur jong u.
Na ka liang jong ki shipai BSF, kila pynlong ia ka jingai burom kaba kyrpang ha killapara ia u tei u riew shlur ha kaba la don lang u Darbara Singh 2IC, 75 Bn BSF. U Commander BS Taygi bam kwai ha dawar u blei u la dei u nongiada ia ka Kallipara na ka kti jong ki shipai Pakistan ha ka thma 1971.
