Shillong, Nailar 3: U bah Chestar Roy Shabong ba shong ba sah ha Wahiengdoh Block-5 u wei na ki dkhot jong ka Non-violent Direct Action (NVDA) ha ka jingialeh ban pynioh ia ka Hills State u la khlad mynta ka sngi, kane ka jingkhlad ka long ka jingduh ia ka jylla baroh kawei.
Na ka liang jong ka Federation of Khasi States, Ka Grand Council of Chiefs of Meghalaya ka phah ia kane ka khubor sngewlem sha ka kong Tynrai Laloo bad ki khun bad baroh kiba ha iing, ki dap da ka jingsngewsih ban ioh jingtip halor ka jingkhlad noh u Bah Chester Roy Shabong mynta ka sngi.
Kum ka jaidbynriew khasi bad ka jylla Meghalaya bad na ka liang ka Federation of Khasi States, Ka Grand Council of Chiefs of Meghalaya, baroh kawei ngim lah shuh ban klet ia ka jingaiti jong u Bah Chester lem bad ki spah ngut kiwei ki samla shipai kiba la shah jied ha u September 1968 ha ka kynhun kaba nyngkong.
Kum ki samla na ka dong Wahiingdoh Mawkhar Circle ban mih kum u volunteer jong ka Non-violent Direct Action (NVDA), ban leit ban mih ban ieng lang bad kiwei ki samla ha khmat Assam secretariat mynta la khot Meghalaya Secretariat) ban khang ban ieng hakhmat khyrdop ka Assam Secretariat ha ka 10 September 1968, khlem salia khlem khuslai kaei kaban jia bad ban dawa “NO HILL STATE NO REST” ha u snem 1968.
Dei ka jingaiti jong u Bah Chester bad kiwei kiwei ki hajar ngut ki shipai shynrang bad kynthei ka Ri Khasi, Jaintia bad Garo ha ryngkat ki rangbah bad ki longkmie kaba la wanrah ka jingioh ia la ka jong ka jylla Meghalaya. Kum ka kynhun ki khlieh nongsynshar ka ai ka jingkhublei ia u tei u rangbah ia ki jingaiti jong u na ka bynta jong ki longdien.
“Ngin nym klet ia phi bad ki shipai ialeh Hill State. Ngi dap da ka jingsngewnguh ba ngi la ioh ia kynduh ia phi markhmat ha ka 22 tarik January 2021 ha kaba ngi la ioh ia ban ioh jingtip halor ka jingpynkhreh ki samla first batch kiba la mih na ka bynta ka NVDA Force na ka bynta ka jingiakhih No Hill State No Rest”. La ong u bah John F Kharshiing.
U Bah Kharshiing u la ong ba wat la kim lah ban poi ban ia don lang ha kum kane ka por hynrei ki phah ka jingsngewlem sha phi baroh kawei ka iing, ki buh ia ka jingduwai ba u trai nongbuh nongthaw un ai bor ia phi ka iing baroh kawei. To u trai nongbuh nongthaw un ai ha ka jingjahthait bamjuhkut.
