Shillong, Kyllalyngkot 05: Ka sorkar pdeng ha u snem 2019 kala wanrah ia ka polisi kumno ban kyntiew ia ka ioh ka kot jong ki nongrep hapoh jong ka Ri baroh kawei da ar shah bad la aiti sha ka “Agricultural and Processed Food Products Export Development Authority” (APEDA) ba kan peit ia kane ka kam.
Na ka liang jong ka APEDA kala ia trei ryngkat bad ki sorkar jylla na ka bynta ban pyntrei kam ia katei ka polisi jong ka sorkar pdeng ban pynthikna ba yn lah ban shallan sha bar ri ia ki marrep sha kiwei ki ri jong ka pyrthei.
Ha baroh shisnem lynter na ka liang jong ka APEDA kala pynlong jingialang bad ki sorkar jylla bapher bapher ban ia kren kumno ban leh ha kaba pyntrei kam ia katei ka polisi jong ka sorkar naduh ban tei ia ki jaka bad ka jingdon kam pisa ban pynurlong ia ka jingkwah ban shallan ia ki marrep sha bar jong ka Ri India.
Haba ia dei bad kane la pynlong ruh bun sien ka jingialang bad ka tnadrep jong ka sorkar pdeng, kum juh ka tnad ri jingrio, ka tnad shna marbam bad kiwei ki tnad sorkar kiba ia don bynta bad ki nongrep ban ia mir jingmut kumno ban weng ia ki jingeh ha ka khaii pateng.
Bun ki jylla kila dep ban thung ia ki shnat trei kam bad ia ki ophisar ban peit kyrpang ha kane ka kam, kum ka jylla Maharashtra, Uttar Pradesh, Kerala, Nagaland, Tamil Nadu, Assam, Punjab bad Karnataka kiba la pyndep ban shna ia ki kyndon katba kiwei ki jylla ki dang don hapdeng ka jingpynkhreh.
Ha kane ka bynta ka jylla Meghalaya kam shym paw kyrteng ei ei ruh em ban don ia ka jingpynkhreh namar bynta ki marrep ban shallan sha bar jong ka Ri India bad la ka Bangladesh ka dei ka Ri kaba syndah bad ka jylla Meghalaya wat la ia ka jingiakynduhlang hapdeng ki nongdei bad ki nongthied la pynlong ha Meghalaya, ha Shillong.
Haba ia dei bad ki kaiphot baroh kaba ia dei bad kane ka kam ban shallan ia ki marrep sha bar jong ka Ri India ki don ha ka website jong ka APEDA, website https://apeda.gov.in. Haduh mynta ki don tang 27 jait ki marrep kiba la lumthup ban shallan sha bar jong ka Ri India.
