Shillong, Nohprah 11: Ka BJP Meghalaya ka la pynmih ia ka kyrwoh ban khot thep kyrteng na ki ban ia aireng na ka BJP ha ka elekshon MDC ka ban sa long ha ka 21 Rymphang 2025.
La buh 30 Nohprah kum ka tarik ba khatduh ban pdiang ia ki kyrteng ha ki distrik komiti bad ia baroh ki kyrteng ba la ibit da ka distrik dei ban pynpoi sha ka state elekshon komiti ka party shwa ka 5 Kyllalyngkot 2025.
Ki mat ba ka BJP ka tyrwa sha ki paidbah ha kane ka elekshon ka long ban pynsted ia ka jingpynbit pynbiang ban pynkylla ia ka khyrngit ba hynriew katkum ki jingdonkam ka por kaba la shu sahteng kumto ha iing dorbar thawain ka ri lane kata ka amendment of sixth schedule.
Shuh shuh ka party ka thmu ban pynkupbor ia ki dorbar shnong bad dorbar raid lymba ka bhah kyrpang ha ka mang tyngka ne kata ka direct funding sha ki dorbar bad khamtam eh ban wanrah ia ka rukom synshar shnong kaba ryntih ia baroh ha ki lum Khasi bad Jaintia.
Bad ruh ban ri ban da ia ki tewi muluk bad ban pynkhlain shuh shuh ia ka rukom treikam ki konsil ha kaban pynneh pynsah ia ki tyllong um, ki khlaw ki btap bad ban pynskhem shuh shuh ia ka khuid ka suba da kaba wad ki lad ki lynti ban wanrah ia ki projek, kane ka long katkum ka kyrwoh kaba la phah da u Sabyasachi Ghose nongkhot ka State Media Cell BJP, Meghalaya Pradesh.
