Shillong, Naiwieng 24: Mynta ka sngi ki san seng kiba kynthup ia ka KSU, FKJGP, HYNYF, RBYF bad JSU kila pynlong ia ka jingialang shuwa ban pynlong ia ka jingthang mombati bad ki nongkren kila kyntu ia ki nongtrei sorkar ba kin ia treilang bad ka jingkhot jong ki ia “ka jingbym iatreilang” da kaba pep trei la shai ka sngi.
Ha ka jingkren u Trebor Suchen general secretary ka seng JSU, u la ong ba kane ka jingjia hapoh Mukroh kam dei shuh ka sien kaba nyngkongm kum kine ki jingjia kila juh jia mynshuwa shuwa ruh.
Ha ka jingwan u myntri rangbah ka jylla sha Mukroh ka seng JSU kala iakren bad u bad kila dawa ba dei ban buh ia ka Police Out post ha shnong Mukroh ym ha Barato, ha juh ka por u la kyntu ia ki paidbah ba kin ia treilang la shai ka sngi da kaba ki pep trei la shai ka sngi.
Ha ka jingkren u bah Sadon Blah President ka seng HNYF la ong ba kane ka jingshah siat ki jaidbynriew kam dei shuh ka sien kaba nyngkong, kala jia ha Langpoih ha kaba saw ngut ki briew kila iap, ka jing shah beh shnong ha Lumdorbar, ha Sahsniang, bad mynta ka shnong Mukroh.
U tei u nongialam u la ong ba ka daw baroh ka dei na ka jingbym lah ban ia pynbeit ia u pud u snem bad u la ong ka sorkar Meghalaya bad Assam wat pynbeit ia u pud u snem da ka snam hynrei dei ban pynbeit da ka jingsuk jingsain.
La ong ba ka sorkar Meghalaya km dei tang ban ujor ejahar hynrei ka dei ban leit kem ia kitei ki pulit jong ka jylla Assam bad wanrah sha Meghalaya ban pynshitom katkum ka ain bad ka sorkar Meghalaya ruh kam thung ia la ka jong ka kynhun tohkit.
U General Secretary ka KSU u samla Donal V Thabah la ong ban rakhe ia ka jingdap 50 snem ka jylla ka sorkar kala buh bun tamasa katba ha khappud kam shym leh ei ei na ka bynta ki khappud bad ki paidbah khasi ki lang dang shah thombor na ka por sha ka por.
La kynnoh ba ka jingpahara jong ki pulit ka long tang ha Shillong bad ka jingiakhun pyrshah tang ha sor Shillong, hynrei ia ki pulit kiba la pyntbit kyrpang ki don tang ha Shillong, dei ban don ia u DIG ba dei peit tang ia ka kam khappud.
Kiwei ki nongialam seng kiba la kren ha kane ka sngi ki long u President ka RBYF, FKJGP bad nongmih khmat na ka seng samla pule Naga kiba pule ha kane ka nongbah Shillong ban ai ka jingyrshan bad ban pynrem ia kaei kaba jia ha Mukroh ha kaba san ngut ki briew kila duh ei ia ka jingim. Ha dien ka jingialang la pynlong ia ka jingthang Mombati ha katei ka jaka.
