Shillong, Iaiong 22: Ha kine ki sngi la iohi ba kane jingpang COVID-19 kala saphriang sted ha kane ka nongbah Shillong, ban iada na kane ka jingsaphriang u myntri rangbah ka jylla mynta ka sngi u la khot ia ka jingalang jong baroh ki MLA jong kane ka nongbah Shillong.
U Symbut Myntri Rangbah ka jylla u bah Prestone Tynsong haba kren ha ki lat pathai khubor ha dien kane ka jingialang la iathuh ba baroh 7 ngut ki MLA jong kane ka nongbah Shillong kila ia poi sha kane ka jingialang bala khot da u myntri rangbah ka jylla.
Ha kane ka jingialang ka sorkar kala kyrpad ia baroh 7 ngut ki MLA jong kane ka nongbah Shillong ba kin ia tynronglang ia kane ka lyngkor bad ka sorkar ban ia kyntu ia baroh ki riew shimet ha Shillong bad sawdong jong ka sor Shillong ba kin leit ban ai Tika kham kloi.
Haba ia dei bad kane baroh ki MLA jong kane ka nongbah Shillong kila ia mynjur lang bad ka bynta kaba ar, la shim ia ka rai ban pynim biang ia ki COVID-19 kommittee ha ki konstitwensi kiba la pynbna ha u snem ba la dep bad kine ki lah ban ia kren bad lada don kam ia ka jingiarap na ka sorkar kin sa pyntip.
Ha kane ka jingialang la don shibun ki jngai jingmut wat ha kaba ia dei bad ki jaka rung jaka mih ha ka jylla, ka sorkar kala pynshai ba kino kino kiba rung sha ka jylla ba ki dei ban leh ka RTPCR Test bad kane ka jingpynkhlain ha ki jaka rung jaka mih ruh yn dang pynkhlain shuh shuh.
Haba ia dei bad ka jingpyrshang ban pynduna ia ka jingwan jong ki briew sha kane ka nongbah Shillong na ka liang jong ka sorkar kala dep ban shim ia ka rai ba naduh ka 26 tarik mynta u bnai yn khang ia ki dukan ki bym dei ki dukan marbam haduh ka 2 tratik Jymmang, kane ka long ban iada na ka jingwan jong ki briew sha Shillong.
