Shillong, Nailar 04: Wat hapdeng ka jingeh kaba ki nongrep ki ia kynduh na kane ka khlam COVID-19 ha ka ia dei ia thied, khamtam eh ia ki mar pyut kum ki jhur, hynrei ka sorkar kam shym la sngewsynei ia ki, hynrei kala khrong bai musur T.10 tyngka shikriah lane shi pla plastic na ki nongrep kiba wan die jhur ha Anjalee Parking Lot bad ia kane ka kam la aiti ha kontraktor ba shimwai ia katei ka jaka.
Ka jingpoi jong ki nongrep sha kane ka jaka kam dei tang na East Khasi Hills hynrei na kylleng jong ka ri lum khasi bad la ong ba ha ka shisngi ka jingpoi ki marrep kiba la thep ha ki polo, kriah, khoh bad byrni kan long ha pdeng 2000 bad 2500 kriah, polo, khoh lane byrni.
Ka sorkar kala pynlong ia ka Anjalee parking Lot kum ka jaka ban ia die jhur kaba ki nongrep na kylleng ki lah ban wan die ia ki jhur jong ki ha katei ka jaka ha ka mala kaba ha jrong duh katba ia ka mala kaba sha poh duh la shah ia ki kali ba wan na Assam ban pynhap ia ki jhur ha katei ka jaka bad ba ki trok kit jhur kin ieng ha katei ka jaka.
Ha ka juh ka por ka sorkar lyngba ka Shillong Municipal Board ha ka 16th Naitung 2020 kala ai jingbit ia ka kontraktor ba shimwai ia kane ka jaka Parking Lot jong ka sorkar ban khrong musur na ki nongrep kiba wan die jhur ha katei ka jaka namar ba ki kali kim ioh ban ieng shuh namar ia ka jaka ba lait la pyndon kam da ki nongrep kiba wan die jhur ha katei ka jaka.
Katkum ka jingbthah kaba la pynmih na ka ophis jong ka Shillong Muncipal Board la ai jingbit ia kaba shimwai ia kane ka jaka ieng kali ban shim T.10 tyngka shikriah, lane shi pla plastic ba ngiam 50 kilo, lane shikriah polo na baroh ki nongdie kiba don ha tnum jong katei ka jaka ieng kali ha Anjalee parking Lot. Katba ia ki trok kiba pynieng ha khrum jong kane ka jaka ieng kali ka long T.500 tyngka ia ki trok bad T.300 tyngka ia ki kali Pick-up.
Haba u SP News Agency u la kren ia u myntri ba dei peit ia ka tnad Municipal u bah Hamletson Dohling, u la ong ba halor kane ym don jingtip ei ei ruh em bad u la ong “Nga la ia u CEO ban lum meeting bad ki nongrep bad nongkhaii ban ia pynbeit lang namar ngam kwah ba kan ktah ia ki nongrep”.
