Shillong, Risaw 12: U Executive member jong ka KHADC u bah Jambor War u la iathuh ba ki don 15 tylli ki hima kiba la dei ban pynlong ia ka ilekshon ban jied ia ki khlieh nongsynshar hynrei na ka daw jong ka COVID-19 la hap ban pynsangeh noh.
Haba kren ha ki nongthoh khubor u bah Jambor la ong ba ka KHADC kala weng noh ia ka jingpynsangeh ban pynlong ilekshon bad ia ki ilekshon ha ki hima bapher bapher kin sdang noh ban pynlong ha u Naiwieng ban wan.
Ki hima kiba la hap ban pynlong noh ia ki ilekshon ki long ka Hima Sohbar, Hima Mawmluh, Hima Umniuhtnmar bad ka Hima Mawbeh ia kine ki hima kin pynlong noh ha u Naiwieng 2021, kitei ki hima la dep ban pynbiang nadong shadong kaba sah sa tang ban pynbna ia ka tarik.
Ia kiwei ki hima pat la bthah ba kin phah noh ia ki kyrtong jong ki nongthep vote hapoh ka hima, na ka liang jong ka KHADC kan pynsted ia ka jingpynlong ia ka ilekshon ha ki hima bapher bapher khnang ba ki hima kin ioh noh ia ki khlieh nongsynshar kiba pura, kiba bun ki dei ki hima Sirdarship.
