Tura, Kyllalyngkot 11: U Myntri rangbah ka jylla u Conrad K Sangma ha ka jingkren jong u ha ka jingialang ba 15th ba juh long shisien shisnem jogn ki khlieh nongsynshar ha Garo Hills ia kaba la tip kum ka “Council of Nokmas” kaba la long Jengjal ha West Garo Hills u la ong ba ka sorkar kan ia kren bad ka sorkar pdeng ba ki jaka bym hap ha ka jingpeit jong ki District Council ruh ki dei ban lait na ka ain jong ka Citizenship Amendment Act 2019.
Ha kane ka jingialang paidbah u la ong ba ka sorkar pdeng ka dei ban shim ia ki lad ki lynti hapoh kane ka ain ban ai ka jingiada ia ki rit paid jong ka dong shatei lam mih ngi kyntup ia ka jylla Assam. Ha kane ka sngi u la pynpaw ruh ia ka jingsngewnguh ba ka sorkar pdeng kala pynlait ia ka jylla Manipur, Nagaland bad Arunachal Pradesh bad bun ki bynta jong ka jylla Meghalaya la pynlait na ka ain CAA, hynrei ha Meghalaya ka sorkar ka kwah ba dei ban pynlait ia baroh kawei ka jylla na ka tei ka ain.
U myntri rangbah u la ong ba ka iing dorbar thawain ka jylla kala dep pdiang ia ka rai ban pyntrei kam ia ka ILP hapoh jong ka jylla Meghalaya bad kane ka sorkar ka iing skhem ha ka nongrim ban dawa ia ka ILP bad mynta kin dang ia kren bad ka sorkar pdeng ban pynlait ia ka jylla Meghalaya baroh kawei ban iada iala ki jong ki briew.
La ong ba bun na ki jylla ha ka dong shatei lam mih ngi jong ka Ri India la pynlait na ka CAA, hyrnei ka jylla Assam ka dang hap hapoh jong ka CAA, kumta la kyntu ruh ba ia kane ka juh ka jingiada dei ban ai ia ki paidbah jong ka jylla Assam da kaba pynlait na ka CAA.
Ha kane ka sngi u myntri rangbah ka jylla u la ong ba ki Nokmas ki long ki bynta ba kongsan ban iada ia ki riewlum. Na ka liang jong ka sorkar kan wad ki lat ki lynti kumno ban shna ia ki ain ban iada ia ka khyndew bad kum juh iala ki jong ki briew bad ki khlieh nongsynshar ki don ka bynta kaba khraw ban iada iala ki jong ki briew ha la ki jong ki jong ki jaka.
