Mairang, Iaiong 23: Na ka daw jong ka jingiai pur stet jong ka khlam COVID-19 ha ka Ri bad ka Jylla bad kum shibynta ban pynthikna ia ka koit ka khiah u paidbah ba bun ba lang , u Additional Deputy Commissioner ba dei peit ia ka Mairang Civil Sub-Division, Mairang u la bthah ia baroh ki kali kamai ban but ia ki kyndon ban iada na ka khlam COVID-19.
U Bah A. Nongbri, ha ka shithi ba u la thoh mynta ka sngi sha ki kynhun jong ki nongniah kali kamai ka thain Mairang, u la bthah ba baroh ki draibar kali kamai ki dei ban leit ai ia ka injek kum shi bynta ba iada na u khniang jingpang COVID-19 bad ki draibar ki dei ruh ban deng beit thik ia ki mask haba don briew ne passenger ha ki kali kamai jong ki.
La bthah ruh ia ki draibar sumo, taksi bad auto rickshaw ba kin pynbiang ia ki sanitizer, ban pynkhuid ia ki kali kamai jongki man ka sngi bad kim dei ban shah iaki passenger bym deng mask ban shong ha ki kali kamai jongki.
Ki dei ruh ban buh iaki kynja pla khnang ba ki briew kin ioh bret ia ki niut bad ym dei ban shah ia ki nongshongkali ban bret niut mata madei ha surok ne lynti syngkien.
Halor ka rukom thepbriew, la bthah iaki draibar ba kin thep passenger katkum ka jingbthah ka tnat Transport, kata, ki Local Taxi (Maruti 800) ki dei ban thep saw ngut ki passenger, laingut hadien bad iwei hakhmat bad kumta ter ter ia kiwci pat ki kali.
La mana ruh iaki draibar bad nongshong kali ban biah pathar bad ban dih duma ne sikret hapoh kali bad kiba pynkhein ia kitei ki kyndon kin shah dain kuna katkum ka ain bad ia ki laisen jong ki draibar kiba pynkhein ia kane ka jingbthah yn shim noh, bynrap shuhshuh u Additional Deputy Commissioner.
