Shillong, Nailur 13: U Myntri Rangbah ka jylla u Conrad K Sangma haba jubab ia ka jingkylli u bah Process T Sawkmie ba balei ka MPSC ka slem ban pynlong ia ki eksam bad ban pynlong ia ki interbiew kam la ong ba hap ban bud ia kiba bun ki kyndon.
Ka MPSC ka dei ban pynbna ia ka jingpynbna ia ki kam balait, ban peitbniah ia ki aplikoshon, ban pdiang ia ki aplikoshon, ban pynlong ia ka eksamin, ban khot ia ka interbiew bad kata ruh ka shong ha ka jingdon ki kam kiba lait.
Ka MPSC kam lah ban buh ia ki kyndon, ia ki kyndon la buh da ki tnad sorkar kiba phah ban khot aplikoshon ha ki kam kiba lait bad ka MPSC ka bud ia kita ki kyndon kiba la bthah ba hap ban pynbiang.
U Myntri Rangbah u la pyntip hapoh ka iing dorbar ki kam kiba ka MPSC ka dei ban khot pynlong eksam bad interbiew kiba sah bad ka MPSC ki don 1301 tylli, bun na kine ki kiba lait dei haka por COVID-19.
Haba juba ia ki jingkylli bynrap u myntri rangbah ka jylla u la ong ba ka jingslem ka dei na kadaw jong ka COVID-19 ha kine ki ar snem bad mynta kala wan kane ka jingpyntrei kam ia ka jingpynbeit ryntih ha ka jingthung kam ha ki tnad sorkar.
U Myntri Rangbah la ong ba ka sorkar kala shim ia ki lat ki lynti ban pynkhlain shuh shuh ia ka jingtreikam jong ka MPSC bad ban pynbeit ruh ia ka rukom khot ia ki eksam bad kum juh ia ki interview bad kawei ka long ban pynbun shuh shuh ia ki jaka thoh eksam.
