Shillong, Nailur 26: U nongrwai sur tynrai ba paw nam jong ka jylla Manipur u Guru Rawben Mashangva haba plie ia ka jingpyninam ia ki dur kiba la dro da ki samla pule jong ka Riti Academy kaba don ha Umsohsun Shillong, u la ong ba ki khynnah samla mynta kila klet iala ka jong ka riti dustur.
U la ong ba ki khun samla ha kane ka juk kila shah tyllep ha ka dustur jong kiwei pat kiba wan na sha bar, u la pynpaw ia ka jingsngewkmen ka jong u ban iohi ba kane ka Riti Academy kala ialeh ban pynneh pynsah ia ki riti dustur jong ki riewlum ha ka dur jong ka jingdro ia ki dur. U la kyntu ia ki bor sorkar ba kin ai lem ka jingkyrshan ia kum kine ki jaka ai jinghikai.
Ha ka jingkren jong u Manish Singh Director jong ka ICCR jong ka sorkar pdeng u la ong ba ki riti dustur jong ki briew kane ka thain shatei lam mih ngi jong ka Ri India kiiapher na kawei ka jaidbynriew sha kaweipat bad ka long kaba don kam ban pynneh pynsah ia ki bad ban leh ia katta kam dei kaba suk.
U la ong ba dei lyngba ki jingdro ka pynisha ka pyrthei ka jinglong kyrpang jong ki briew iala ka jong ki riti dustur, u la ong ba ka sorkar India kan sa leit ban pyninam sha Czechoslovakia ia kaba la tip kum ka North East festival ha kaba yn rah ia ki jingdro na kane ka thain bad u ki jingdro jong ka Riti Academy ruh kin shah jied lang bad kum juh ia ki nongrwai sur tynrai.
Kane ka jingpyninam ia ki jingdro kiba ia dei bad ka riti dustur kan long saw sngi lynter ha kaba ki paidbah ki lah ban leit ban peit. Ha kane ka sngi u trai jong ka Riti Academy u Bah Raphel Warjri u la ai ia ka jingkren pdiangburom ia ki nongwan iashim bynta.
