Shillong, Nohprah 19: U Director General ka North East Zone, ka tnat Information & Broadcasting, u B. Naraya
nan u la ong mynta ka sngi ba ka Election Commission jong ka India ka dei ka dak jong ka bor kaba peit ia ka jingpynlongelekshon kaba iaidbeitiaidryntih.
Haba u kren shaphang ki jingshem jong u kum u Election Observer ha Karnataka, Oridsa bad Madhya Pradesh, u Director General u la ong ba ki don ki seng sain pyrthei kiba la pyrshang na ka por sha ka por ban pynkylla ia ka jingsngew jong ki briew da kaba pyndonkam ia ki media hynrei ka rukom treikam jong ka Election Commission of India ka long kaba khlain bad kaba lah ban tehlakam ia kine ki jinglehbakla.
U Director General u la ong ia kane ha ka jingai jingkren ha ka Media Workshop – Vartalap kaba la pynlong mynta ka sngi ha Shillong halor ka phang ‘Media and Election – Electoral Risk Management and Communication with Media’.
Ka Press Information Bureau, Shillong, ha ka jingiatreilang bad ka DIPR Meghalaya bad ka Shillong Press Club, ki la pynlong ia ka ‘Vartalaap’ mynta ka sngi namar ka jinglong shen ki elekshon ha kane ka jylla.
U la kren shaphang ki jingeh kiba ki bor pyniaid elekshon ki iakynduh ha kane ka juk mynta ha kaba u la ban jur halor ka jingiadei hapdeng ka jingtrei kine ki bor bad ki rynsan social media. U la ong ba ki rynsan social media ki ong ba ki don ki polisi shaphang ki khubor ba ki pynmih bad ba ki don ruh ki ‘bor algorithm’ kiba treikam.
U Narayanan u la ong ba kine ki sienjam ban ialeh pyrshah ia ki khubor thok kan plié lad ia ki resol kiba lah ban pynshisha ha ki kam elekshon ki ban iada bad pynneh ia ki ‘jinglaitluid’, kaba ki rynsan social media ki donkam.
U la kren ruh shaphang ki jingeh kiba dang mih ha ka jingpynlongelekshon kiba kynthup ia ka jingmushlia ia ki jingtip. Ki jingpyrshang ban pyndap jingtip bakla ha ki kam media kin kiew ha kine ki sngi ban wan bad ki nongthoh khubor ki dei ban long kiba husiaria kine.
Ki don ki kynhun paidbah bad ki kam Sorkar kiba la sdang ban pynshisha ia ki jingtip da kaba pyndonkam ia ki atiar online bad kane ka la iarap bha ia ki briew jong ka ri, khamtam ha ki por ka jingeh kum ka khlam.
U Chief Electoral Officer, Bah F.R Kharkongor ha ka jingai jingkren jong u, u la ong ba ka Election Commission ka niew kongsan ia ka jingpynthikna ban don ka jinglong jingman kaba plié lad ia ki elekshon kiba iaid hok ha ka jylla.
U CEO u la batai bniah shaphang ka bynta jong ka media ha ka jingpynthiknaia kane. U la ong ba ka Election Commission ka pyrshang ban pynthikna ba ka jingpynlong elekshon ha ka jylla ha kine ki bnai ban wan kan long kaba iaid hok bad kaba iaid ryntih.
U la ong, “Ki media ki dei ki khmat bad ki shkor jong ka Election Commission bad ngi ngeit skhem ba ka dei kaba kyntiew ia ka bor, kaba wanrah ia ka elekshon kaba hok bad kaba iaidbeit, bad ka dei ka jingpyrshang jong ka media bad ka Election Commission. Ka long kaba donkam bha ban pyni ia ka jingshisha namar ka kam elekshon ka dei ka kam kaba iadei bad ka jingsngew jong ki briew”.
Ha ka jingkren shaphang ka jingtreikam jong ki EVM, u bah Kharkongor u la ong ba ka commission ka buh ia ki thong ia ka jingpynlongelekshon kaba iaidbeit, iaidryntih bad ka long kaba kloi ban pdiang bad pyntreikam ia ki teknoloji katkum ka juk mynta ban pynkhlain bad pynbha shuh shuh ia ka kam pynlong elekshon.
U Malthus S. Sangma, MCS, Director, tnat IPR, Meghalaya u la pdiang ia ka bynta ba ka media ka don ha ki kam sain pyrthei bad ka imlang sahlang mynta ha kaba ka long ka nongiada ia ka jingshai jong ka kam synsharpaidbah. U la ong, “Dei namar kane ba ki ong ba kane ka dei ka bynta jong ki nongpeit bniah”.
Ka jingshai ka long kaba donkam ha ki kyrdan bapher bapher kaba kynthup ka jingioh ia ka jingtip, ka jingbahkhlieh bad ka jingshisha jong ki briew, ki kynhun bad ki kam, bad na ka bynta ka jingiashim bynta kaba dei ha ka jingiatainiapaidbah, u la ong. Ka jingshai ka long kaba donkam ban ioh ia ki jingtip.
Ka mut ba ki nongthep vote ki dei kiba ioh ia ka jingtip kaba shai bad kaba pura khnang ba ki lah ban shim ia ka rai kaba dei bad khnang ba ki ophisar bad ki kynhun ki long kiba bahkhlieh.
U la ong ba ka elekshon kam lah ban long katkum ka synsharpaidbah lada ki briew kim lah ban iashim bynta kaba pura bad kim ioh ban jied da ka jinglaitluid. Kumta, ki media ki long kiba donkam bha ban pynthikna ba ka don ka rynsan kaba shai na ka bynta ka jingiatainia bad ka jingiashim bynta ha ki jingiakren.
U nongthoh khubor uba la tbit, u Anirban Roy u la ai jingbatai shaphang ka jingpdiang ia ka jingpyndonkam hok ia ki atiar digital ha ka jingpynsaphriang jingtip. U la kdew sha ki lad kiba don ha ki khubor ba ialam bakla ha ki social media kiba lah ban ktah ia ka jingpynlong ia ki elekshon kiba hok bad kiba iaidbeit ha ka pyrthei.
U la ong, “Ka jinglum khubor ka la long kaba eh ha kane ka juk digital. Ban ialeh pyrshah bad kiwei kiwei ki kynhun media bad ban treikam stet, ki nonglum khubor ki shaniah bha ha ki jingtip ba ioh paidbah.
Ki dur bad ki jingtip na ka Facebook, ki tweet, ki group instagram bad whatsapp ki la long ki tyllong ioh khubor. Ki jingtip paidbah kim dei kiba la pynshisha bad ki don shibun kine kiba bakla. Bun ki por ba ki nongthoh khubor ki iakynduh jingeh haba ki thoh ia ki khubor ki bym dei.”
U Roy u la ong ba u dap da ka jingkhuslai halor kane bad u la ong ba ka la dei ka por ia ki nongthoh khubor ba kin nang ban ialeh pyrshah ia ka thma khubor thok ha ki synsharpaidbah kum ka India, khamtam ha ki por elekshon.
Ki nongthoh khubor kiba trei shibun ki kam ha kajuh ka por ha ki por elekshon ki dei ban long kiba tbitsa ha kawei ka kam kaba long ka Digital Forensics, u la bynrap.
Ki nongthoh khubor ki dei ban nang ban ithuh ia ki dur bad ki video thok, bad ki dei ruh ban ithuh ia ki tweet thok. U la ai nuksa ruh ia ki atiar online kiba lah ban pynsuk ia ka jingpynshisha ia ki jingtip ba ioh.
U Bikash Singh, Correspondent na ka Economic Times u la kren shaphang ki jingkheinjingdiah ha ki kam elekshon. U la batai bniah shaphang ki kyndon ba la buh da ka Election Commission ban ialeh pyrshah ia ka jingpyndonkam da ka bor pisa ha ki por elekshon.
U la ong ruh ba ki don ki seng sain pyrthei kiba dawabeit ban pynhehia u pud ka jingpynlut pisa da kaba ong ba ka jingkiewdor ki mar ka dei ka daw jong kane. U la ong ruh ba dei ban peit bniah ia ki kam pisa ha ki kam elekshon ha India naduh ki jingktah jong ki elekshon ia ki kam bapher bapher bad ki jingioh myntoi katto katne ki nongthep vote bad ki longiing.
U la ong ba ka jingpynlongelekshon ka ban khia bha ia ka pla pisa jong ka Sorkar bad ym lah ban len ba donkam ban pyndonkam lut ki lad jong ka Sorkar ban pynthikna ia ka elekshon kaba hok, kaba iaidbeit bad kaba pdiang ia baroh. U la ong ba ka jingshaniah jong ki briew ha ka resol jong ka elekshon ka dei kaba kongsan ha ka koit ka khiah jong ka synsharpaidbah.
U la ong ruh ba ka bynta, ka rukom treikam bad ka jingkhlain jong ki bor pyniaid elekshon ki dei ki nongrim jong ka ‘jingkhuid ka kam elekshon’ namar ka peit ia ka nongrim bad ka jingtreikam jong kanokano ka ri kaba bud ia ka synsharpaidbah.
Ha kaba sdang jong ka prokram, u bah David Laithphlang, President Shillong Press Club u la ong ba ki nongthoh khubor ki don ka bynta kaba khraw ban ai ia ka khubor kaba ryntih bad kaba dei kaba iarap ia ki briew ba kin shim ia ki rai kiba dei ha ka por elekshon.
Kumta, ka long kaba donkam ban peit ia kane ka bynta khnang ban pynshlur ia ka jingiashim bynta ha ki kamelekshon, u la ong. Ki nongthoh khubor na Shillong bad Nongpoh ki la wan iashim bynta ha kane ka Vartalap.
